DAVIES, JOHN ('John Davies, Nantglyn'; 1760 - 1843), gweinidog gyda'r Methodistiaid Calfinaidd.

Ni ellir yma wneuthur cyfiawnder â'r gwreiddioldeb a'i nodweddai, ond y mae Cofiant byr iddo gan T. Parry (Caerlleon, 1844), a chynhwysir ei hunangofiant yn hwnnw - gweler sylwadau Henry Rees arno, yn Y Drysorfa, 1844, 151; ganwyd 1 Hydref 1760 yn y Glythan Uchaf, Henllan (Dinbych), ac ni chafodd ysgol ond yn un o ysgolion Madam Bevan. Argyhoeddwyd ef yn 1778 gan John Evans o Gil-y-cwm, a dechreuodd bregethu yn 1785; yr oedd yn un o'r rhai a ordeiniwyd yn urddiad cyntaf y Methodistiaid Calfinaidd yn 1811. Serch iddo ddioddef cryn erlid, enillodd boblogrwydd mawr fel pregethwr, ledled Cymru ac yn Llundain. Priododd yn 1787 (bu ganddo bump o blant), a symudodd i fyw yn Nant-yr-hengoed, Nantglyn; ar farw ei briod (1837) aeth i fyw yn nhref Ddinbych. Bu farw 10 Mehefin 1843.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Y ffynonellau a enwyd uchod, gydag E. P. Jones, Methodistiaeth Galfinaidd Dinbych, 1735–1909 (1936), 1936, 155-7

Delweddau

• William Roos, John Davies

Dolenni Ychwanegol

• VIAF: 24251463
• Wikidata: Q20733371

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/