HUMPHREYS, THOMAS JONES (1841 - 1934), gweinidog Wesleaidd

Ganwyd 16 Mai 1841 yn Narowen, yn ŵyr o du ei dad i un o ymddiriedolwyr cyntaf capel Wesleaidd Tŷ Cerrig. Addysgwyd ef yng Ngholeg Normal Abertawe (1861-2). Bu'n bregethwr cyflogedig ar gylchdaith Pwllheli (1862-5), ac wedi hynny yn weinidog ar gylchdeithiau Amlwch (1865), Abergele (1867), Blaenau Ffestiniog (1869), Llanberis (1872), Bagillt (1874), Llanfaircaereinion (1877), Tregarth (1880), Bangor (1883), Dolgellau (1886), Coedpoeth (1889), Llanrhaeadr Mochnant (1892), Manceinion (1894), yr Wyddgrug (1897), Conwy (1900), Manceinion (1903), Machynlleth (1905), Coedpoeth (1907). Ymneilltuodd yn 1910; bu farw ym Mangor 16 Chwefror 1934. Yr oedd yn llywydd y gymanfa Wesleaidd yn 1906.

Ysgrifennodd ysgrifau lawer i'r Eurgrawn Wesleaidd, yn cynnwys cyfres ar 'Emynyddiaeth Wesleyaidd Gymreig' (1902-3). Ymysg ei lyfrau cyhoeddedig gellir enwi 'Esboniad yr Efrydydd' ar Rhufeiniaid 1889, Ioan 1891, Hebreaid 1892, Matthew 1895, Marc 1898, a Luc 1899; llyfrau athrawiaethol fel Rhagoriaeth Moesoldeb y Beibl 1880, Damcaniaeth Dadblygiad 1880, Athroniaeth Foesol y Beibl 1883, ac eraill; llawlyfr ar drefn y Wesleaid, Y Rheoliadur, 1885; a braslun gwerthfawr o hanes ei gyfundeb, Methodistiaeth Wesleyaidd Gymreig, 1900. Daliodd hefyd swyddi taleithiol, a bu'n aelod o fyrddau ysgol Abermaw a'r Wyddgrug.

Awdur

• Y Parchedig Griffith Thomas Roberts, (1887 - 1977)

Ffynonellau

• Yr Eurgrawn Wesleyaidd, 1912, 321-4; 1934, 127-32; 1872, 260, 297-9; 1927, 241-6

Dolenni Ychwanegol

• Wikidata: Q20734492

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/