LEWIS, THOMAS (1671? - 1735), gweinidog gyda'r Bedyddwyr

Ganwyd tua 1671, yn fab ac etifedd John Lewis, bonheddwr tiriog a Bedyddiwr o'r Glascwm a welsai lawer o ddioddef yng nghyfnod yr erledigaeth. Ymaelododd y mab, fel ei dad o'i flaen, gyda'r Bedyddwyr yn Llanllieni, o gwmpas 1692 neu o leiaf cyn 1694, a bernir iddo ddechrau pregethu yn fuan wedi hynny. Yr oedd wedi gadael Llanllieni cyn 1707, ac wedi casglu Bedyddwyr dwyrain Maesyfed at ei gilydd yn eglwys yn y Glascwm a New Radnor. Bu'n llafurus yn eu plith, a dywedir yn ystadegau'r Dr. John Evans (1715) fod ganddo gynulleidfa o 400. Yn 1728 penodwyd ef a Thomas Evans, brawd Caleb Evans, gweinidog y Pentref, Maesyfed, yn ddosbarthwyr y ' Baptist Fund ' yng Nghymru. Bu farw yn 1735, a'i gladdu mewn mynwent yn y Glascwm a roddasid i'r eglwys gan ei dad.

Awdur

• Benjamin George Owens

Ffynonellau

• Llyfr eglwys Llanllieni a hanes yr eglwys gan Joshua Thomas yn Ll.G.C.
• Joshua Thomas, Hanes y Bedyddwyr ymhlith y Cymry: o amser yr Apostolion, hyd y flwyddyn hon: yn ddwy ran (Caerfyrddin 1778)
• Hanes y Bedyddwyr yn Nghymru
• Jones, The History of the Baptists in Radnorshire (1895)

Dolenni Ychwanegol

• Wikidata: Q20734495

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/