ROBERTS, DAVID FRANCIS (1882 - 1945), gweinidog gyda'r Methodistiaid Calfinaidd, ac awdur

Ganwyd 15 Tachwedd 1882 yn 3 Libanus Terrace, Bontnewydd, yn fab i Robert ac Ellen Roberts. O'r ysgol elfennol aeth i ysgol sir Caernarfon, coleg y Brifysgol, Bangor (1901-1904), coleg y Bala, ac am flwyddyn i Brifysgolion Berlin a Marburg. O 1908-1912 bu'n ddarlithydd cynorthwyol mewn Hebraeg ym Mhrifysgol Glasgow. Ordeinwyd ef yn 1912, a bugeiliodd eglwysi Maenofferen, Blaenau Ffestiniog 1912-1921, Fitzclarence Street, Lerpwl 1912-1929, capel Tegid a'r capel Saesneg, Bala, a Llanfor 1929-1945. Priododd 18 Awst 1921 Sarah Ann Davies merch hynaf G. G. Davies, Glan-y-pwll Villa, Blaenau Ffestiniog. Cyfrannodd yn helaeth i lenyddiaeth Feiblaidd : sgrifennodd werslyfrau, llyfr ar Hanes yr Hebreaid esboniad ar Hagai a Secharïa, ac ysgrifau lawer i gylchgronau ei enwad. Bu ganddo hefyd erthyglau yn yr International Bible Standard Encyclopaedia. Ef oedd is-olygydd y Geiriadur Beiblaidd a gyhoeddwyd yn 1926, a golygydd cyffredinol y Geiriadur Diwinyddol y dechreuwyd ei baratoi dan nawdd Prifysgol Cymru, gwaith a ataliwyd gan yr ail Ryfel Mawr. Bu'n un o olygyddion y Traethodydd o 1929-1945, yn ysgrifennydd ac yn llywydd adran ddiwinyddol Urdd y Graddedigion, a gwnaeth lawer o waith ynglŷn â'r cyfieithiadau newydd o'r Beibl a gyhoeddir dan nawdd y Brifysgol. Gwasanaethodd fel ysgrifennydd pwyllgor Ysgol Sul y Gymanfa Gyffredinol o 1932-1937, ysgrifennydd Cymdeithasfa'r Gogledd o 1936-1938 ac wedyn am 1940, ac fel llywydd Cymdeithasfa'r Gogledd am 1941. Yn ddiweddarach penodwyd ef yn ysgrifennydd dros y gogledd i Gomisiwn Ad-drefnu ei enwad.

Yr oedd yn ŵr o argyhoeddiadau cryfion, yn ddiddichell a mawrfrydig ei ysbryd, yn gydwybodol a thrylwyr yn ei holl waith. Bu farw yn y Bala 9 Medi 1945, yn 62 oed, a chladdwyd ef yn Nghaeathro.

Awdur

• Y Parchedig John Ellis Meredith, (1905 - 1981)

Ffynonellau

• Y Drysorfa, 1941, 99
• Y Goleuad, 19 Medi, 1945
• Y Seren, 22 Medi, 1945=
• Blwyddiadur y Methodistiaid Calfinaidd, 1946, 176
• Nodiadau gan ei ferch, Miss Rhiannon Francis Roberts
• adnabyddiaeth bersonol

Dolenni Ychwanegol

• VIAF: 101485701
• Wikidata: Q20738033

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/