WILLIAMS, WILLIAM WYN (1876 - 1936), gweinidog (MC) a bardd

Ganwyd ym Mlaenau Ffestiniog, 12 Gorffennaf 1876, yn fab i deulu crefyddol o ardal y Bowydd. Bu'n ddisgybl athro yn Nhanygrisiau cyn mynd i'r Coleg Normal ym Mangor. Aeth wedyn yn athro i ardal Wrecsam. Dechreuodd bregethu ac aeth i Goleg y Brifysgol a'r Coleg Diwinyddol yn Aberystwyth. Yn 1909 sefydlwyd ef yn weinidog ar gapel Moriah (MC), Llanystumdwy; symudodd oddi yno yn 1921 i Salem, Dolgellau, ac o'r fan honno yn 1925 i Glan-rhyd, Llanwnda. Cyhoeddodd ddwy gyfrol o gerddi Wrth Borth yr Awen (1909) a Caniadau (1911). Gŵr swil a cherddgar ydoedd. Bu'n wael, a threuliodd flwyddyn er lles ei iechyd yn teithio trwy T.U.A. a Phatagonia ac yn dringo'r Andes. Priododd Kate Pritchard o Fetws Garmon yn 1927 a bu iddynt un mab. Bu farw 12 Tachwedd 1936.

Awdur

• Bedwyr Lewis Jones, (1933 - 1992)

Ffynonellau

• Blwyddiadur y Methodistiaid Calfinaidd, 1938, 211-2
• Y Goleuad, 25 Tachwedd 1936, 8

Dolenni Ychwanegol

• Wikidata: Q20821251

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/