ALLEN, JAMES (1802 - 1897), deon Tyddewi a hynafiaethydd

Ganwyd 15 Gorffennaf 1802, mab David Bord Allen, rheithor Burton, Sir Benfro. Cafodd ei addysg yn ysgolion Westminster a Charterhouse ac yng Ngholeg y Drindod, Caer-grawnt (B.A., 1825, M.A., 1829). Fe'i hordeiniwyd yn ddiacon, 1834, ac yn offeiriad, 1835; bu'n gurad Miserden, swydd Gaerloyw, 1834-9, ficer Castell-Martin, Sir Benfro, 1839-1872, deon gwladol Castell-Martin, 1840-1875, canon Tyddewi, 1847-1870, canghellor a chanon preswyl Tyddewi, 1870-8, a deon gwladol Pebidiog, 1875; a bu'n ddeon eglwys gadeiriol Tyddewi, 1878-1895.

Priododd Isabella Dorothea, ferch Peter R. Hoare, Kilsey Hall, swydd Caint.

Yr oedd yn hynafiaethydd da ac yn aelod selog o'r 'Cambrian Archaeological Association.' Rhoes lawer o'i amser a'i arian tuag at y gwaith o adnewyddu'r eglwys gadeiriol (yn arbennig rhan o gorff yr eglwys, un o'r darnau croes, llyfrgell capel S. Thomas, y trysordy, a nennau capel yr esgob Vaughan a'r is-gapelau). Bu farw 25 Mehefin 1897.

Awdur

• Y Canghellor John Williams James

Ffynonellau

• Venn, Alumni Cantabrigienses
• T. Morgan, Enwogion Cymreig 1700-1900 (1907), t.9
• H. Blackwell, NLW MS 9252A: A Dictionary of Welsh Biography
• Robson, The Cathedral Church of Saint David's. A short history and description of the fabric and episcopal buildings, etc. (1896)

Dolenni Ychwanegol

• Wikidata: Q15989799

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/