BARKER, THOMAS WILLIAM (1861 - 1912), cofrestrydd esgobaeth Tyddewi

Ganwyd 12 Mai 1861 yng Nghaerfyrddin, mab J. H. Barker, cyfreithiwr lleol a fu ei hun yn glerc bwrdeisdref Caerfyrddin a chofrestrydd esgobaeth Tyddewi. Addysgwyd ef yn Ysgol Ramadeg y Frenhines Elisabeth yng Nghaerfyrddin ac yn Harrow. Ymsefydlodd fel cyfreithiwr, a daeth yn aelod o gwmni Barker, Morris, a Barker gyda'i dad fel prif aelod.

Apwyntiwyd ef yn ysgrifennydd i esgob Tyddewi ym Mehefin 1897 ac yn gofrestrydd yr esgobaeth yn Chwefror 1899, swydd a lanwodd hyd ei farw. Yn wleidyddol yr oedd yn Geidwadwr. Ymddiddorai ym myd natur a hynafiaethau. Cymerai ran flaenllaw mewn mudiadau lleol - milwrol, ieuenctid, etc. Crynhodd lawlyfr Saesneg, A Handbook to the Natural History of Carmarthenshire, a gyhoeddwyd yn 1905, a hefyd Particulars relating to the endowments, etc., of livings in the diocese of S. Davids, a gyhoeddwyd yn 1907 mewn pedair cyfrol, un am bob archddiaconaeth yn yr esgobaeth. Ynghyd a Francis Green crynhodd restrau o offeiriadon Sir Benfro - rhestrau a gyhoeddwyd yn ddiweddarach yn West Wales Historical Records. i-vi, 1912-6. Bu farw 7 Gorffennaf 1912.

Awdur

• Griffith Milwyn Griffiths

Ffynonellau

• Cofrestri esgobol Tyddewi
• The Welshman, 1861 a 1912

Dolenni Ychwanegol

• Wikidata: Q20734539

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/