BEVAN, HOPKIN (1765 - 1839), pregethwr gyda'r Methodistiaid

Ganwyd 4 Mai 1765 yng Ngellifwnwr (neu Cilfwnwr), Llangyfelach, mab i Rees a Mary Bevan. Cafodd ychydig o addysg yn Llangyfelach ac Abertawe. Ymunodd â'r Methodistiaid yn y Gopa-fach yn 1788; dechreuodd bregethu tua 1792; ordeiniwyd ef yn y fintai gyntaf yn sasiwn ordeinio gyntaf y Methodistiaid yn Llandeilo Fawr, 1811. Bu'n bregethwr poblogaidd a theithiodd y wlad benbwygilydd yn ôl arfer ei oes.

Yr oedd hefyd yn llenor ac emynydd. Cyhoeddodd: Marwnad … Griffydd Morgans (Caerfyrddin, I. Daniel, 1796 Hymnau a Phenillion (Abertawy, E. Griffiths), 1837; Ychydig Hanes neu Goffadwriaeth (Abertawy, E. Griffiths), 1838. Ceir nifer o emynau a marwnadau yn y ddau ddiwethaf; y mae'r olaf yn gronicl gwerthfawr o ddechreuad Methodistiaeth ym Morgannwg. Cyhoeddwyd ei hunangofiant gan ei fab yn 1840, a chasglwyd ei brydyddiaeth gan ei gofiannydd yn 1899.

Bu farw 29 Rhagfyr 1839, a'i gladdu yng nghanol capel Bethel, Llangyfelach.

Awdur

• Y Parchedig Gomer Morgan Roberts, (1904 - 1993)

Ffynonellau

• Ychydig o hanes bywyd y Parch. H. Bevan, Cilfwnwr, Llangyfelach, Morganwg, un o'r geinidogion hynaf yn mhlith y trefnyddion Calfinaidd (1840)
• W. Samlet Williams, Cofiant y Parch. Hopkin Bevan, Llangyfelach gyda darlun o hono (Dolgellau 1899)
• W. Samlet Williams, Hanes Methodistiaeth Gorllewin Morgannwg sef hanes Eglwysi y Methodistiaid Calfinaidd yng Ngorllewin Morgannwg, o ddechreuad Methodistiaeth hyd o gylch y flwyddyn 1870 (1916), 173-4
• Cylchgrawn Cymdeithas Hanes y Methodistiaid Calfinaidd, ii, 44-7, 74-8; vii, 68-72

Darllen Pellach

• T. Morgan, Enwogion Cymreig 1700-1900 (1907), tt.20-21

Dolenni Ychwanegol

• Wikidata: Q20733178

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/