BEVAN, THOMAS (1796? - 1819), cenhadwr o dan Gymdeithas Genhadol Llundain

Ganwyd yng nghymdogaeth y Neuaddlwyd, Sir Aberteifi, tua 1796. Hanoedd o gartref crefyddol, a darllenai'r Beibl yn 8 oed. Cafodd 'droedigaeth' wrth fferm Nantgwynfynydd, ac ymaelododd yn y Neuaddlwyd 19 Tachwedd 1810. Yno yr oedd y Dr. Thomas Phillips yn weinidog. Anogwyd ef i bregethu. Aeth i athrofa'r Dr. Phillips i Benybanc, ac oddi yno i goleg y Drefnewydd a Gosport. Trefnwyd iddo ef a Stephen Laidler fyned i Fadagascar. Ordeiniwyd ef yn Neuaddlwyd 20 a 21 Awst 1817. Priododd Mary Jones (Mary Jacob, a chymryd ei henw bedydd), merch Pen-yr-allt Wen o'r un ardal. Hwyliasant am Fadagascar ar 9 Chwefror 1818; cyrraedd Mauritius ar 3 Gorffennaf 1818, ymadael ymhen pum wythnos a glanio ym mhorthladd Tamatave, Madagascar, 18 Awst 1818; cychwyn ysgol a 10 o blant; cyrchu ei deulu o Mauritius a dychwelyd 6 Ionawr 1819; eu marw oll, ei blentyn 20 Ionawr, ef ei hun 31 Ionawr, a'i briod 3 Chwefror 1819, a'u claddu ym mynwent Tamatave.

Awdur

• Y Parchedig Ddr Evan Lewis Evans, (1898 - 1978)

Ffynonellau

• A Register of Missionaries, Deputations etc., from 1796 to 1885 (1886) 57, 58
• Hanes Eglwysi Annibynnol Cymru, iv, 104
• G. Penar Griffith, Cenhadon Cymreig, 34-6
• E. Lewis Evans, Cymru a'r Gymdeithas Genhadol, sef hanes ei Chychwyn (1945), 64-9, 95

Darllen Pellach

• T. Morgan, Enwogion Cymreig 1700-1900 (1907), tt.21-22

Dolenni Ychwanegol

• Wikidata: Q3524912

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/