DAVIES, BENJAMIN (1814 - 1875), Hebreydd

Ganwyd yn Wernberny ger St Clears, mab i Silvanus Davies, ffermwr. Dechreuodd bregethu 'n 15 oed, ond collodd yn ddiweddarach yr huodledd yn y ddwy iaith a'i nodweddai'n gynnar yn ei yrfa. Bu yn ysgolion Glandŵr, 'Forge,' Caerfyrddin, a Rhydyceisiaid, cyn ei dderbyn i Goleg y Bedyddwyr, Bryste (1830). Wedyn bu'n dilyn cyrsiau pellach yn yr ieithoedd Semitaidd yn Nulyn, Glasgow, a Leipzig; yn yr olaf enillodd radd Ph.D. a chyfeillgarwch amryw o Hebreyddion Almaenig nodedig. Dychwelodd yn 1838 ac fe'i hordeiniwyd yn Llundain cyn iddo ymgymryd â'r swyddi academaidd a lanwodd weddill ei oes, sef: (a) prifathro cyntaf y Montreal Training College i hyfforddi cenhadon i wladfaoedd Gogledd America (1838-44); (b) llywydd ac athro diwinyddiaeth yn Stepney Baptist College, Llundain (1844-7); (c) athro ieithoedd Semitaidd yng Ngoleg McGill, Montreal (1847-57); a (ch) athro yn yr ieithoedd clasurol a dwyreiniol yn Regent's Park Baptist College (gynt Stepney) (1857-75). Priododd Eliza Try, o Portland, Maine, yn ystod ei arhosiad cyntaf yng Nghanada; bu hi farw o'i flaen, a bu yntau farw 19 Gorffennaf yn nhŷ ei fab yn Frome.

Ymysg ei weithiau y mae: nodiadau mewn argraffiad newydd o E. Robinson, Harmony of the Gospels; cyfraniadau helaeth i Paragraph Bible y R.T.S. ac i Thes. Syr. Payne-Smith; Student's Hebrew Grammar a Student's Lexicon of the Hebrew Language wedi eu seilio ar weithiau Almaeneg Roediger a Gesenius. Yng Nghanada golygodd y cyfnodolyn The Register (1838-44) i'r Bedyddwyr, ac yn Llundain bu'n aelod o bwyllgor Diwgwyr yr Hen Destament Saesneg.

Awdur

• Dafydd Rhys ap Thomas

Ffynonellau

• Oxford Dictionary of National Biography
• The Baptist, 30 Gorffennaf 1875
• The Freeman, 30 Gorffennaf 1875
• Baptist Handbook, 1876
• David Jones, Hanes y Bedyddwyr yn Neheubarth Cymru (1839), 499-502
• C. H. Cooper, From Stepney to St Giles': The Story of Regent's Park College 1810-1960 (Llundain 1960)

Dolenni Ychwanegol

• VIAF: 100334550
• Wikidata: Q18559698

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/