DAVIES, CADWALADR (1704 -?), bardd, baledwr, a chasglwr cerddi

' Piser Sioned ' (Bangor MS. 3212 (564)); ganwyd yn Llanycil, mab Dafydd Thomas a Lowry Cadwaladr. Athro ysgol yn ymyl y Ddwyryd ger Corwen, ac yn Nhre'rddol (hyn yn 1740). Casglwyd y ' Piser ' o gwmpas y blynyddoedd 1733-45; cerddi a charolau plygain yw'r corffmawr, ffrwyth canu beirdd Penllyn ac Edeirnion, gwlad Cerrig-y-drudion, a rhannau uchaf Hiraethog. Heblaw'r cerddi, ymhoffai Cadwaladr Davies mewn sêr-ddewiniaeth, dehongli tywydd a breuddwydion, a dangos rhinweddau cysegredig dyddiau-gŵylion; yr oedd yn dipyn o ddoctor dynion ac anifeiliaid yn ogystal. Talai rent am dŷ a thyddyn i John Humphreys o'r Maerdy ger Gwyddelwern o 1729 i 1739; rhybudd i ymadael yn 1743. Amser ei farw'n ansicr.

Awdur

• Thomas Richards, (1878 - 1962)

Ffynonellau

• Gwybodaeth oddi wrth Mr. Robert Owen
• tystiolaethau oddi mewn i Llawysgrif Bangor yng Ngholeg y Gogledd, Bangor 3212
• am 'Ail Biser Sioned' gweler NLW MS 9047A

Dolenni Ychwanegol

• Wikidata: Q20732678

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/