DAVIES, WILLIAM DANIEL (1838 - 1900), llyfrwerthwr

Ganwyd mewn bwthyn o'r enw Llety gerllaw Felindre, Penboyr, Sir Gaerfyrddin, 15 Mehefin 1838. Yn 1857 dechreuodd weithio yng ngweithiau haearn Hirwaun ac Aberdâr; bu'n gweithio hefyd, yn ddiweddarach, yn Llwydcoed lle yr ymunodd â Moriah, eglwys y Methodistiaid Calfinaidd. Symudodd i'r Rhondda yn 1862 i weithio yn y pyllau glo. Dechreuasai bregethu gyda'r Methodistiaid Calfinaidd tua'r adeg hon.

Yn 1868 ymfudodd i U.D.A., gan ymsefydlu yn Hyde Park, gerllaw Scranton. Yn fuan ar ôl cyrraedd ymunodd â llu o Gymry eraill yn America i gyhoeddi papur newydd - Baner America. Ysgrifennodd lawer o erthyglau i'r papur hwnnw; ymwelodd â Chymru yn 1874 a rhoes hanes ei daith yn ei golofnau. Bu am flynyddoedd lawer yn trafaelio fel gohebydd Y Drych, newyddiadur Americanaidd arall. Yr oedd hefyd yn adnabyddus fel darlithydd cyhoeddus. Yr oedd ar daith ddarlithio yng Nghymru pan fu farw yn Wrecsam, 22 Mawrth 1900.

Cyhoeddodd amryw lyfrau. Yn eu plith y mae: Llwybrau Bywyd neu Haner Can Mlynedd o Oes Wm. D. Davies (Utica, 1889), Cartref Dedwydd ac Ysgol y Teulu, 1897, ac America a Gweledigaethau Bywyd, 1894.

Awdur

• Robert (Bob) Owen, (1885 - 1962)

Ffynonellau

• Bye-Gones, relating to Wales and the Border Counties, 1900, 357

Dolenni Ychwanegol

• Wikidata: Q20734583

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/