DAVIES, JOHN DAVID (1831 - 1911), hynafiaethydd

Ganwyd ym mhersondy Oxwich, 14 Ionawr 1831, mab John Davies, rheithor Reynoldston (1834-1873), a'i wraig Louisa. Ymunodd â Choleg y Drindod, Dulyn, fel ' Ysgolor Rossall,' 28 Hydref 1850; graddiodd yn B.A. 20 Chwefror, gan gymryd tystysgrif diwinyddiaeth 24 Mawrth 1855, ac M.A. 1859. Ordeinwyd ef yn ddiacon 23 Medi 1855, a'i drwyddedu i guradiaeth Nicholaston, ac yn offeiriad 21 Medi 1856. Bu'n gaplan dros gyfnod i iarll Milltown. Cafodd reithoraeth Llanmadog 28 Mehefin 1860, a Cheriton 2 Awst 1867, a daliodd y ddwy ynghyd am weddill ei oes. Adnewyddwyd y ddwy eglwys o dan ei ofal. Yr oedd yn gerfiwr medrus mewn coed, a gwelir ei waith yn eglwysi Llanrhidian, Llanmadog, Llangennydd, a Cheriton. Bu farw yn ddibriod, 30 Medi, a'i gladdu, 4 Hydref 1911, ym mynwent Cheriton. Gwnaeth ymchwil fanwl i hynafiaethau Gŵyr, a chyhoeddodd ffrwyth ei lafur mewn pedair cyfrol - A History of West Gower (Abertawe, 1877-94). Cyhoeddodd hefyd A few words on noncommunicating attendance (Abertawe 1879).

Awdur

• Evan David Jones, (1903 - 1987)

Ffynonellau

• Crockford's Clerical Directory
• George Dames Burtchaell and Thomas Ulick Sadleir, Alumni Dublinenses: a register of the students, graduates, professors and provosts of Trinity college in the University of Dublin (1593-1860) (Llundain 1924)
• N.L.W. Cofysgrifau'r Eglwys yng Nghymru yn Llyfrgell Genedlaethol Cymru - Llandaff
• South Wales Daily News, 2 Hydref 1911
• 'The Historian of West Gower', Gower:, VI, tt.7-9

Dolenni Ychwanegol

• Wikidata: Q20733364

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/