DAVIES, JOHN LLOYD (1801 - 1860), Blaendyffryn ac Alltyrodyn, Llandysul, aelod seneddol

Ganwyd yn Aberystwyth ar 1 Tachwedd 1801. Hyfforddwyd ef yn y gyfraith ac erbyn ei fod yn 24 mlwydd oed yr oedd wedi ymrestru'n gyfreithiwr yng Nghastellnewydd Emlyn.

Yn 1825 priododd Anne, merch John Lloyd, Alltyrodyn, a thrwy'r briodas yr etifeddodd yr ystad honno. Priododd yr eilwaith yn 1857 ag Elizabeth Bluett, unig ferch Thomas Bluett Hardwicke, Tytherington Grange, sir Gaerloyw.

Yr oedd yn ynad heddwch ac yn ddirprwy raglaw dros siroedd Aberteifi a Chaerfyrddin, ac yn uchel siryf sir Aberteifi yn 1845. Yn 1855 fe'i etholwyd yn aelod seneddol dros Fwrdeisdrefi Aberteifi ond fe ymddeolodd yn yr etholiad cyffredinol ddwy flynedd yn ddiweddarach. Ceidwadwr ydoedd mewn gwleidyddiaeth ac yn aelod selog o'r Eglwys.

Yn ystod gwrthryfel Beca ef oedd prif wrthwynebydd y rhai a dorrai'r clwydi yn ardal Llandysul. Gweithiodd i sicrhau rheilffordd o Gaerfyrddin i Landysul a llwyddodd yn ei amcan.

Bu farw 21 Mawrth 1860 yn 59 mlwydd oed.

Awdur

• Nansi Ceridwen Jones

Ffynonellau

• Notable Welshmen (1700–1900) (1908)
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), i, 201-2
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• W. J. Davies, Hanes Plwyf Llandyssul (1896)
• W. R. Williams, The parliamentary history of the principality of Wales, from the earliest times to the present day, 1541-1895 (Brecknock 1895)
• H. Blackwell, NLW MSS 9254A: A Dictionary of Welsh Biography
• Thomas Nicholas, Annals and Antiquities of the Counties and County Families of Wales (London 1872), cyf.I
• Thomas Nicholas, Annals and Antiquities of the Counties and County Families of Wales (London 1872), cyf.II

Darllen Pellach

• Erthygl Wicipedia: John Lloyd Davies

Dolenni Ychwanegol

• Wikidata: Q20733551

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/