DAVIES, THOMAS (1820 - 1873), Llandeilo, gweinidog Annibynnol

Ganwyd yn Nhrelech, 3 Ebrill 1820. Cafodd ei dderbyn yn aelod yno 8 Ebrill 1838. Aeth yn ifanc i weithio ym Maesteg, Morgannwg. Dychwelodd yn 1841 i fynychu'r Ysgol Frutannaidd yn Nhrelech. Bu flwyddyn yn ysgol Thomas, Caerfyrddin, ac yng Ngholeg Aberhonddu, 1843-7, lle yr oedd yn fyfyriwr eithriadol o ymroddgar. Enillodd enw fel pregethwr cymeradwy iawn. Ordeiniwyd ef yn y Tabernacl, Llandeilo, 10 a 11 Awst 1847. Bu'n gofalu am eglwys Hermon, Llansadwrn, 1847-50. Bu ar daith yn America yn 1871. Meddai ar bersonoliaeth hawddgar. Ganed ef yn freiniol fel llefarwr llithrig, huawdl; yr oedd yn un o bregethwyr mwyaf poblogaidd a nerthol ei gyfnod. Cynyddodd ei eglwys yn fawr yn ystod ei weinidogaeth. Cychwynnodd ysgol ddydd yn ei gapel. Ysgrifennodd yn aml i'r Diwygiwr, Y Beirniad, etc. Ef oedd awdur Hanes Cenedl y Cymry; Cofiant y Parch. T. Jenkins, Penygroes; Bywyd ac ysgrifeniadau D. Rees, Llanelli; Catecism Cenhadol. Bu farw 28 Hydref 1873.

Awdur

• Y Parchedig John Dyfnallt Owen, (1873 - 1956)

Ffynonellau

• William Thomas, Cofiant a Phregethau y Diweddar Barch. Thomas Davies, Llandilo (Llandeilo 1877)

Dolenni Ychwanegol

• Wikidata: Q20734430

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/