DAVIES, THOMAS WITTON (1851 - 1923), Hebreigydd ac ysgolhaig Semitaidd

Ganwyd 28 Chwefror 1851, yn Nant-y-glo, sir Fynwy, o rieni anllythrennog ond duwiol. Symudodd y teulu i Witton Park, swydd Durham, ac yno, yn yr ysgol-bob-dydd, y derbyniodd ef yr unig addysg a gafodd hyd nes troi ohono ei 21 oed. Yn 1872 derbyniwyd ef i Goleg y Bedyddwyr, Pontypwl, ac ar wahan i gyrsiau arferol y coleg myfyriodd yn ddiwyd yng ngweithiau Thomas Carlyle a Samuel Taylor Coleridge, a pharhaodd eu dylanwad arno trwy gydol ei oes. Yn 1879 aeth o Pontypwl i Goleg Regent's Park, Llundain, a Choleg Prifysgol Llundain, a dyfod yn y tymor hwn yn helaeth dan ddylanwad y Dr. James Martineau.

O 1879 hyd Ragfyr 1880 bu'n weinidog ar eglwys High Street, Merthyr Tydfil, ac o 1881 hyd 1891 yn athro yn y clasuron yng Ngholeg y Bedyddwyr yn Hwlffordd. O 1891 hyd 1898 ef oedd llywydd Coleg y Bedyddwyr yn Nottingham, ac yn ddarlithydd ym mhrifysgol y dref honno mewn Arabeg a Syrieg; yn ystod y tymor hwn bu am dymhorau yn rhai o brifysgolion yr Almaen, ac yn Leipsic am flwyddyn dan yr athrawon enwog Buhl, Socin, a Dalman. Bu'n ddisgybl hefyd i Sayce, yr ysgolhaig Asyriaidd, a threuliodd dymor yn Strasburg dan Noldeke. O 1898 hyd 1905 bu'n athro Hebraeg yng Ngholeg y Bedyddwyr ym Mangor, ac o 1905 hyd 1921 yn athro Hebraeg yng Ngholeg y Brifysgol.

Cyhoeddodd amryw erthyglau yn ymwneuthur ag astudiaeth Ddwyreiniol a Semitaidd yng nghyfnodolion yr Almaen a Lloegr ac America; erthyglau yn Y Geiriadur Beiblaidd, a Dictionary of the Bible (Hastings), Deuteronomy (Peake's Commentary), Magic, Divination and Demonology (James Clarke); Psalms, cyf. ii; ac Ezra, Nehemiah and Esther (Century Bible); Heinrich Ewald (T. Fisher Unwin); ac Ysgrythurau yr Hen Destament (Wrecsam). Daliai radd Doethur o Brifysgolion Leipsig a Jena. Daeth ei lyfrgell fawr i Lyfrgell Genedlaethol Cymru.

Bu'n briod ddwy waith: (1) 1880, i Mary Anne Moore, a fu farw ym 1910, gan adael un merch, a (2) 1911, â Hilda Mabel Everett, a chael mab a merch. Bu farw 12 Mai 1923.

Awdur

• Y Parchedig Lewis Edward Valentine, (1893 - 1986)

Ffynonellau

• T. Witton Davies, Outstanding Literary and Human Factors of My Life (Aberhonddu 1911)
• T. Witton Davies, 'Vita,' yn Magic, Divination, and Demonology among the Hebrews and their neighbours,: including an examination of Biblical references and of the Biblical terms (Llundain 1898)
• Who was who?
• gwybodaeth gan Mrs. Witton Davies
• gwybodaeth gan Y Gwir Barchedig Ddeon Tyddewi

Darllen Pellach

• LlGC: To the Rev. T. Witton Davies
• LlGC: To the Rev. T. Witton Davies

Delweddau

• LlGC: Mrs. T. Witton Davies

Dolenni Ychwanegol

• VIAF: 47503513
• Wikidata: Q5617820

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/