EDWARDS, DOROTHY (1903 - 1934), nofelydd

Ganwyd yn Ogmore Vale, Sir Forgannwg, merch Edward Edwards, prifathro ysgol, ac ŵyres i'r Parch. Taliesin Jones, Groeswen. Cafodd ei haddysg yn Ysgol Howells, Llandaf, ac yng Ngholeg y Brifysgol, Caerdydd; graddiodd mewn Groeg ac athroniaeth er mai yn llenyddiaeth Saesneg yr oedd ei diddordeb pennaf.

Cyhoeddodd Rhapsody, casgliad o ystorïau byrion, yn 1927, a Winter Sonata yn 1928. Er fod Winter Sonata ar ffurf nofel yr oedd yn nofel a ysgrifenwyd ar ffurf anghyffredin a gwreiddiol; yr oedd yn dibynnu ychydig ar y 'plot' ond llawer mwy ar safleoedd, ar ddisgrifio cymeriadau, ac, yn arbennig, ar 'awyrgylch,' Dywedai rhai o'r beirniaid llenyddol gorau - Gerald Gould yn eu plith - i'r awdures daro nodyn newydd yn llenyddiaeth Saesneg a chyfrifwyd hi yn un o dri ysgrifennwr gorau'r flwyddyn. Yr oedd dylanwad rhai o nofelwyr Rwsia, Dostoievsky a Turgenev yn arbennig, i'w ganfod yn amlwg ar ei gwaith.

Treuliodd Dorothy Edwards y rhan helaethaf o'i hoes fer yng Nghaerdydd, eithr bu'n byw am chwe mis yn Vienna, naw mis yn Florence, ac am beth amser yn Llundain. Yr oedd hi'n gantores dda hefyd a medrai ganu yn ieithoedd Rwsia, yr Almaen, yr Eidal, ac yn Gymraeg. Yr oedd iddi ddiddordeb mewn gwleidyddiaeth - mynnai fod yn sosialydd ac yn genedlaetholydd Cymreig ar yr un pryd, er na fedrai siarad Cymraeg. Bu farw 6 Ionawr 1934 yng Nghaerdydd trwy ei llaw ei hun, pan nad oedd ond 31 oed.

Awdur

• Harold Mostyn Watkins

Ffynonellau

• Western Mail, 8 Ionawr 1934
• The Times, 9 Ionawr 1934
• adnabyddiaeth bersonol

Darllen Pellach

• Claire Andrea Flay-Petty, Dorothy Edwards (Gwasg Prifysgol Cymru 2011)
• Erthygl Wicipedia: Dorothy Edwards

Dolenni Ychwanegol

• VIAF: 30993066
• Wikidata: Q5298404

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/