EDWARDS, EDWARD ('Pencerdd Ceredigion'; 1816-1897), cerddor

Ganwyd yn Little Darkgate Street, Aberystwyth, mab i John Edwards. Hanoedd o deulu cerddorol, ac yn ddyn ieuanc mynychai yntau eglwys Llanbadarn, lle y ceid canu rhagorol gan y côr. Symudodd y teulu i fyw i Blaenycwm, ger Capel Dewi, dewiswyd ef yn arweinydd canu yng nghapel y Methodistiaid, a pharhaodd i fod yn arweinydd am dros 70 o flynyddoedd. Daeth i Aberystwyth i ddilyn ei alwedigaeth fel crydd, a daeth i gyffyrddiad â nifer o gerddorion da a drigai yn y dref. Bu am ychydig yn byw yn Nhredegar, Mynwy, ond daeth yn ôl i Aberystwyth. Ffurfiodd gôr yn y Tabernacl, Aberystwyth, ac o dan ei arweiniad perfformiwyd y 'Messiah,' 'Creation,' 'Seasons,' a'r 'Twelfth Mass,' a chodwyd safon caniadaeth yn y dref. Bu farw 16 Medi 1897, a chladdwyd ef ym mynwent gyhoeddus Aberystwyth.

JACK EDWARDS (1853 - 1942), llyfrwerthwr

Mab Edward Edward, o Great Darkgate Street, Aberystwyth. Yr oedd yn ddatganwr da, ac a fu yn llanw swydd yn yr Unol Daleithiau fel datganwr; yr oedd yn eiddgar iawn ym mhlaid 'Esperanto.'

Awdur

• Robert David Griffith, (1877 - 1958)

Ffynonellau

• Y Cerddor, Tachwedd 1897, a 1917, 64, 72, 83, 95

Delweddau

• John Thomas, Edward Edwards (Pencerdd Ceredigion, 1816-97)
• H. H. Davies & Son, Jack Edwards

Dolenni Ychwanegol

• Wikidata: Q20732936
• Wikidata: Q52911912

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/