EDWARDS, JOHN ('Meiriadog '; 1813 - 1906), bardd, llenor a golygydd

Ganwyd yn Llanrwst, ac yn yr ysgol ramadeg yno y derbyniodd ei addysg cyn bwrw prentisiaeth fel argraffydd. Dangosodd dueddiadau llenyddol yn gynnar, a rhwng 1835 a 1860, yn arbennig, ymddangosodd llawer o'i farddoniaeth yn Seren Gomer, Y Dysgedydd, Y Diwygiwr, Y Gwladgarwr, a'r Drysorfa. Bu'n byw yn Cefn Mawr, Llanfaircaereinion, Caerdydd, a Merthyr Tydfil, cyn dychwelyd yn 1844 i Lanfaircaereinion lle y priododd Elizabeth Watkin. Yno y treuliodd weddill ei oes. Yr oedd yn Fedyddiwr Campbelaidd taer iawn, ac yn Rhyddfrydwr digymrodedd. Ystyrid ef yn ei ddydd yn awdurdod ar ramadeg a chystrawen Cymraeg, ac yn feistr ar reolau cynghanedd. Bu'n llwyddiannus iawn fel cystadleuydd eisteddfodol, gan ennill nifer o gadeiriau. Yr oedd hefyd yn feirniad poblogaidd. Bu'n olygydd Yr Hyfforddwr am gyfnod (o 1852), a'r Llusern o 1858. Bu farw 24 Gorffennaf 1906 yn 93 mlwydd oed. Cyflwynwyd ei lawysgrifau i'r Llyfrgell Genedlaethol yn 1926.

Awdur

• Dr David Jenkins, (1912 - 2002)

Ffynonellau

• Bye-Gones, relating to Wales and the Border Counties, 1906, 275
• T. M. Jones, Llenyddiaeth fy Ngwlad: sef hanes y newyddiadur a'r cylchgrawn Cymreig yn Nghymru, America, ac Awstralia, yn nghyd a'u dylanwad ar fywyd cenedl y Cymry (Treffynnon 1893), 103, 105
• Rhestr gyda nodiadau byrion, o Enwogion Cymreig o 1700 i 1900 (1908)
• Archifau LlGC: NLW MSS 5950-72

Darllen Pellach

• Erthygl Wicipedia: John Edwards

Dolenni Ychwanegol

• Wikidata: Q20565356

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/