EDWARDS, Syr WILLIAM RICE (1862 - 1923), llawfeddyg a chyfarwyddwr cyffredinol gwasanaeth meddygol India

Ganwyd yng Nghaerlleon, sir Fynwy, 17 Mai 1862, mab y canon H. Powell Edwards. Addysgwyd ef yn Ysgol Coleg Madlen, Rhydychen, Coleg Clifton, a'r London Hospital. Enillodd radd M.D. yn 1886, a'r flwyddyn honno ymunodd â gwasanaeth meddygol India fel llawfeddyg, a gweithio yn nhalaith Bengal. Yn 1890, fe'i penodwyd yn llawfeddyg personol i'r arglwydd Roberts, ac arhosodd gydag ef am bedair blynedd. Wedi i'r arglwydd Roberts symud o'r India aeth Edwards i'r adran wleidyddol, ond yn 1899, pan benodwyd Roberts yn gadfridog yn Ne Affrig, dewiswyd Edwards yn aelod o'i staff, a gwasnaethodd yn rhyfel De Affrig, 1899-1900. Dychwelodd i'r India, yn llawfeddyg yn Kashmir, ac ymhen naw mlynedd dyrchafwyd ef yn brif swyddog meddygol talaith gogledd-orllewin India, ac yn 1915 yn brif llawfeddyg cyffredinol Bengal. Yn 1918, fe'i penodwyd yn gyfarwyddwr cyffredinol gwasanaeth meddygol India, a bu yn y swydd honno hyd ei ymddiswyddiad yn 1923. Dyma gyfnod pwysig yn hanes llywodraeth India, ac Edwards a fu'n gyfrifol am drefnu a chyfarwyddo gwasanaeth meddygol India a'i drosglwyddo i ddwylo'r trigolion. Yr oedd iddo barch mawr fel cynghorwr a meddyg ac fel trefnydd manwl ac effeithiol. Bu'n briod ddwywaith. Bu farw yn Llundain 13 Hydref 1923.

Awdur

• Idwal Lewis

Ffynonellau

• British Medical Journal, 20 Hydref 1923

Darllen Pellach

• Obituary: The Late Major-General Sir William Rice Edwards, The Indian Medical Gazette, vol. 58, 12, December 1923, pp.606-607
• Erthygl Wicipedia: William Rice Edwards

Dolenni Ychwanegol

• Wikidata: Q20732979

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/