ELLIS, ROWLAND (1841 - 1911), esgob Aberdeen ac Ynysoedd Orch;

Ganwyd 24 Ebrill 1841, mab Thomas Ellis, llawfeddyg, Caerwys. Addysgwyd ef yn ysgol ramadeg Rhuthyn a Choleg Iesu, Rhydychen, lle y graddiodd yn 1863. Daeth yn gurad Gresford, 1864, ficer Gwersyllt, 1868, a ficer yr Wyddgrug, 1872. Rhwng 1873 a 1884 gweithredodd fel deon gwlad yr Wyddgrug. Yn y cyfnod hwn ymwelai yn aml â W. E. Gladstone yng nghastell Penarlâg. Priododd yn 1869 Margaret Elizabeth, merch hynaf y llawfeddyg-filwriad William Brydon, C.B. O 1884 hyd ei benodi yn esgob yn 1906 bu yn rheithor eglwys S. Paul, Edinburgh. Brwydrodd yn egnïol yn erbyn datgysylltiad yr Eglwys yng Nghymru, ac oherwydd ei wybodaeth drwyadl o Gymru daeth yn amddiffynnydd cadarn i hawliau'r Eglwys. Ysgrifennodd nifer o weithiau diwinyddol. Bu farw yng nghastell Delgaty, Turiff, swydd Aberdeen, 11 Rhagfyr 1911.

Awdur

• Walter Thomas Morgan, (1912 - 1990)

Ffynonellau

• Who was who?, 1897-1916
• The Church Times, 15 Rhagfyr 1911

Dolenni Ychwanegol

• Wikidata: Q7372121

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/