EVANS, ARTHUR (1755 - 1837), gweinidog gyda'r Methodistiaid Calfinaidd

Ganwyd yn y Felindre, Penboyr, 2 Medi 1755; enw ei dad oedd Thomas Evans. Gadwyd ei yn amddifad ond magwyd ef yn wehydd gan ewythr. Yn 1773, ymunodd â'r seiat yng Ngwern-yr-hafod, ac aeth i academi Caerfyrddin, ond ni lwyddodd i gael urddau. Yn 1782 dechreuodd bregethu, a thua'r un adeg priododd (bu ganddo bedwar o blant), ac aeth i gadw ysgol yng Nghynwyl. Wedyn, cymerodd dyddyn Waunlwyd, a bu yno 27 mlynedd. Yr oedd yn un o'r 13 a ordeiniwyd yn Llandeilo Fawr yn 1811. Bu farw 20 Ebrill 1837. Nid ystyrid ef yn bregethwr neilltuol dda, ond yr oedd yn drefnydd nodedig, a bu'n ysgrifennydd ei gyfarfod misol am chwarter canrif. Efe oedd awdur y pennill enwog 'Dyro afael ar y bywyd.'

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Y Gwyddoniadur Cymreig (1889–96) (ail arg.) (helaethiad o 'Cofiant y Parch Arthur Evans, Cynwil, Sir Gaerfyrddin,' yn Y Drysorfa, Ionawr 1839)
• J. Thickens, Emynau a'u Hawduriaid (1945), 1945

Dolenni Ychwanegol

• Wikidata: Q20732629

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/