EVANS, DAVID (1793 - 1861), lliwiedydd gwydr

Bedyddiwyd ef 21 Ebrill yn Llaneglwys, Llanllwchaiarn, Sir Drefaldwyn, mab David a Mary Evans. Prentisiwyd ef i Mr. (wedi hynny Syr) J. Betton o'r Amwythig; yn 1815 daeth yn bartner â Betton. Gwaith Evans oedd y ffenestri lliwiedig ym mhlas Hawkstone Park, Sir Amwythig, a gynlluniwyd yn gywrain ganddo. Rhwng 1822 a 1828 gwnaed atgyweiriadau helaeth ar ffenestri capel Coleg Winchester gan Evans a Betton, ac ystyriwyd eu gwaith ar y ffenestr fawr yn ochr ddwyreiniol yr adeilad yn nodedig am y modd y copïwyd yn ofalus gynllun y gwaith gwreiddiol a roddwyd yno gan William o Wykeham. Ceir enghreifftiau eraill o waith Evans yn ffenestr ddwyreiniol eglwys Llwydlo a wnaed gyntaf tua 1445, ac yn ffenestri eglwys gadeiriol Lincoln ac eglwys yr abaty, Amwythig. Bu Evans farw yn Amwythig 17 Tachwedd 1861.

Awdur

• Mary Gwyneth Lewis, (1912 - 1999)

Ffynonellau

• H. Blackwell, NLW MSS 9257A: A Dictionary of Welsh Biography
• The Records of the Diocese of Saint Asaph in the National Library of Wales yn Ll.G.C.
• Notable Welshmen (1700–1900) (1908), 271
• H. Pidgeon, Memorials of Shrewsbury, being a concise description of the town and its environs. Adapted as a general guide... (Amwythig 1837), 204
• J. D. le Couteur, Ancient glass in Winchester (Winchester 1920), 69-71
• Hugh Owen a John Blakeway, A History of Shrewsbury (London 1825), v, 2, 81
• S. Redgrave, A Dictionary of Artists of the English School (London 1878), 145

Dolenni Ychwanegol

• Wikidata: Q20732811

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/