EVANS, HUGH ('Hywel Eryri '; 1767 - 1841?), bardd

Ganwyd ym mhlwyf Llanfairmathafarneithaf, sir Fôn. Gwehydd ydoedd wrth ei alwedigaeth. Bu'n byw yn Abererch, Chwilog, Plas Madog ym mhlwy Clynnog, a Phenygroes, Sir Gaernarfon. Dechreuodd gystadlu mewn eisteddfodau yn gynnar ar ei oes; ysgrifennodd gywydd ar ' Cariad ' ar gyfer eisteddfod Bangor, c. 1790, ac un arall yn 1802 ar ' Drylliad y llong Minerva, Ionawr 21, 1802.' Ceir swm o'i waith yn y North Wales Chronicle, Corff y Gaingc, Blodau Arfon, Tywysog Cymru, Y Gwladgarwr, etc. Cyhoeddwyd tair neu bedair o gerddi o'i waith - e.e., ' Achwyniad Hywel o'r Yri wrth Wragedd Gwynedd am dderbyniad Morgan Rondl a gwrthodiad Syr John Haidd o'r Gadair Seneddol.' Bu farw ym Mhenygroes rywbryd ar ôl mis Mai 1840.

Awdur

• Robert (Bob) Owen, (1885 - 1962)

Ffynonellau

• Y Brython, 1860, 134, 165; 1861, 153
• Blodau Arfon (1842-1869)
• 'Cybi,' Ardal y cewri enwogion plwyf Llangybi, a'r cylch ynghydag enwau lleoedd, eu hystyr a'u traddodiadau
• Y Traethodydd, 1851, 388
• Y Geninen, 1905, 215
• W. R. Ambrose, Hynafiaethau, cofiannau, a hanes presennol Nant Nantlle y traethawd buddugol yn Eisteddfod Gadeiriol Pen-y-groes, Llun y Pasg, 1871 (1872), 42
• A Bibliography of Welsh Ballads printed in the 18th century (London 1908-11) (gol. J. H. Davies), 103, 118
• llawysgrifau ym meddiant yr ysgrifennydd

Dolenni Ychwanegol

• Wikidata: Q20733191

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/