EVANS, DAVID LLOYD (1861 - 1912), siopwr, trafaeliwr, a cherddor

Ganwyd 29 Rhagfyr 1861, mab Evan ac Ellen Evans, Adwy-ddu, Penrhyndeudraeth, Sir Feirionnydd. Cafodd ei wersi cerddorol cyntaf yn nosbarthiadau John Roberts, Porthmadog, a thrwy astudio Gramadeg Cerddoriaeth ' Alawydd ' a llyfrau eraill daeth yn gerddor da. Bu ' Cân y Cryd ' a'r ddeuawd ' Mae'r byd yn llawn o ganu ' yn boblogaidd, a chafodd ei ranganau ' Trig gyda mi,' ' Oleuni Mwyn,' a'r ' Tylwyth Teg,' gylchrediad eang. Yr oedd ganddo gôr llwyddiannus yng Nghorwen, lle y bu'n trigo am beth amser, a hefyd un ym Mhenrhyndeudraeth, a chymerai ran yng ngwyl gerddorol Harlech. Gelwid arno'n fynych i arwain cymanfaoedd canu a beirniadu yn yr eisteddfodau. Bu farw 13 Rhagfyr 1912, a chladdwyd ef ym mynwent Nazareth, Penrhyndeudraeth.

Awdur

• Robert David Griffith, (1877 - 1958)

Ffynonellau

• Y Cerddor, Ionawr 1913

Dolenni Ychwanegol

• Wikidata: Q20732861

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/