EVANS, WILLIAM (1823 - 1900), ficer Rhymni a chanon mygedol yn eglwys gadeiriol Llandaf

brodor o Langeler, Sir Gaerfyrddin. Addysgwyd ef yng Ngholeg Dewi Sant, Llanbedr Pont Steffan, lle'r oedd yn ysgolor blaenaf ('senior scholar') ac enillwr y wobr am yr Hebraeg a diwinyddiaeth. Ordeiniwyd ef yn 1848 i guradiaeth S. Mair, Aberteifi. Bu'n gurad Gelligaer, 1850-3, a Throed-yr-aur, 1854-6. Penodwyd ef yn ficer Rhymni yn 1856, ac arhosodd yno hyd ei farw. Yr oedd yn un o glerigwyr blaenaf esgobaeth Llandaf, ac anrhydeddwyd ef â'r swyddi canlynol: prebend dirprwyol S. Cross neu Henry Morgan yn eglwys gadeiriol Llandaf, 1878; caplan cartrefol esgob Llandaf, 1883; a proctor i ddeon a chabidwl Llandaf, 1886. Bu'n gyd-olygydd Y Cyfaill Eglwysig o 1864 hyd 1866 pan ddaeth yn unig olygydd. Parhaodd i olygu'r misolyn hwn hyd 1893, pan ymddiswyddodd oherwydd afiechyd. Bu farw 8 Awst 1900.

Awdur

• John James Jones, (1892 - 1957)

Ffynonellau

• Y Cyfaill Eglwysig (1862-1957), 1894, 1900
• Crockford's Clerical Directory

Dolenni Ychwanegol

• Wikidata: Q20734611

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/