GRIFFITH, OWEN ('Eryr Eryri '; 1839 - 1903), cerddor

Ganwyd 12 Awst 1839 ym Mhenllyn ger Cwmyglo, Sir Gaernarfon, mab i Griffith Owen, cerddor da ac arweinydd seindorf Llanrug. Ymunodd Owen Griffith â chôr Waenfawr o dan arweiniad Pierce Williams, a chafodd hyfforddiant cerddorol gan yr arweinydd. Yn 1866 rhoddodd yr arweinydd y côr i fyny, a phenodwyd Owen Griffith yn olynydd iddo. Ymunodd y côr â gŵyl gerddorol Dirwestwyr Eryri, a chymerodd ran amlwg tra parhaodd yr ŵyl. Yn 1862 dechreuodd Owen Griffith gystadlu gyda'r côr, a bu'n llwyddiannus i ennill yn y prif eisteddfodau am flynyddoedd, ac yn eisteddfodau cenedlaethol Bangor 1874, Pwllheli, 1875, a Birkenhead. Cyfansoddodd rai caneuon a'r anthem ' Da was, da a ffyddlon.' Bu'n arweinydd cymanfaoedd canu ac yn feirniad mewn eisteddfodau. Bu farw 4 Ionawr 1903, a chladdwyd ef ym mynwent Llanrug.

Awdur

• Robert David Griffith, (1877 - 1958)

Ffynonellau

• Y Cerddor, Medi 1897, Chwefror 1903
• Y Geninen, 1903

Dolenni Ychwanegol

• Wikidata: Q20734070

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/