GROVE, Syr WILLIAM ROBERT (1811 - 1896), gwyddonydd a chyfreithiwr

Ganwyd 11 Gorffennaf 1811 yn Abertawe, mab i John Grove ac Anne (gynt Bevan). Aeth i Goleg Brasenose, Rhydychen, a graddiodd B.A. 1832, M.A. 1835. Cafodd radd D.C.L. yn 1875 a LL.D., Caergrawnt, yn 1879. Ym mis Tachwedd 1831 aeth i Lincoln's Inn a daeth yn fargyfreithiwr yn Nhachwedd 1835. Tueddai yn gryf at wyddoniaeth ac enillodd fri mawr am ei ymchwiliadau gwyddonol. Daeth yn aelod o'r Royal Institution yn 1835 ac yn is-lywydd yn 1844. Etholwyd ef yn F.R.S. yn 1840. O 1840 hyd 1847 bu'n athro yn y London Institution, ac yn 1847 cafodd fathodyn y Royal Society. Yn 1853 gwnaed ef yn Q.C., ac am rai blynyddoedd bu'n gysylltiedig â chylchdeithiau cyfreithiol De Cymru a Chaer. Bu'n farnwr o 1871 hyd 1887. Gwnaed ef yn farchog yn 1872 ac yn aelod o'r Cyfrin Gyngor ar ei ymddiswyddiad yn 1887. Yn 1837 priododd May Emma Maria, merch John Diston Powles, Summit House, Middlesex; bu hi farw yn 1879. Bu ef farw yn Llundain, 1 Awst 1896.

Awdur

• Griffith Milwyn Griffiths

Ffynonellau

• Oxford Dictionary of National Biography (Supp.)

Darllen Pellach

• Colin Matheson, The Glamorgan Historian, 9 (1973), 96-104
• Iwan Rhys Morus, William Robert Grove: Victorian gentleman of science (Cardiff 2017)
• John Wilson, William Wilson, James M. Wilson, William Robert Grove: the lawyer who invented the fuel cell (Metolius Ltd. 2007)
• Placiau glas Abertawe: William Grove
• Erthygl Wicipedia: William Robert Grove

Gweithiau

• William Robert Grove, On the correlation of physical forces (London 1846)

Dolenni Ychwanegol

• VIAF: 37697176
• Wikidata: Q561117

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/