HARRIS, JOHN (1680 - 1738), esgob Llandaf

mab George Harris, Milford, Sir Benfro. Aeth i Goleg Iesu, Rhydychen, yn 1697 (B.A., 1701; M.A., 1714). Bu am gyfnod yn rheithor Rudbaxton, Sir Benfro, ac o 1708 hyd 1729 yn rheithor Llanbedr Efelffre. Yn 1728 daeth yn gymrawd o Goleg Oriel, Rhydychen; yr un flwyddyn cafodd radd D.D. gan Brifysgol Caergrawnt a'i wneuthur yn ganon yn eglwys gadeiriol Caergaint. Yn 1729 gwnaethpwyd ef yn ficer Ticehurst, Sussex, yn ddeon eglwys gadeiriol Henffordd, ac ar 19 Hydref fe'i cysegrwyd yn esgob Llandaf gan archesgob Caergaint yng nghapel Plas Lambeth. Yn 1736 rhoes i fyny fod yn ddeon Henffordd a dyfod yn ddeon Wells.

Fel y gwelir oddi wrth y llu a ordeiniodd yr oedd Harris yn esgob gweithgar. Eithr fe'i coffeir oblegid iddo adfer adeilad yr eglwys gadeiriol. Cymerodd arno swydd pennaeth y cabidwl a rhoes ei holl egni i'r gwaith o gasglu arian. Trefnodd i'r pensaer enwog, John Wood, o Bath, adeiladu y ' Deml Eidalaidd ' y tu mewn i furiau'r eglwys gadeiriol; edmygid hon yn fawr yn ei ddydd ef eithr condemniwyd hi'n llwyr yn y ganrif ddilynol.

Bu'r esgob farw ar 28 Awst 1738 a chladdwyd ef yn eglwys gadeiriol Wells. Gosododd ei fab dabled yn ei goffáu ar fur deheuol y clas.

Awdur

• Yr Archddiacon Lawrence Thomas, (1889 - 1960)

Ffynonellau

• Foster, Alumni Oxonienses: the members of the University of Oxford
• Acts of the Bishops of Llandaff (1908–12)
• A. Ollivant, Some account of the condition of the fabric of Llandaff cathedral from 1575 to its reopening in 1857; with extracts from the act books of the Cathedral (1857)
• E. J. Newell, Diocesan History of Llandaff (1902)
• J. H. James, A history and survey of the cathedral church of SS. Peter, Paul, Dubritius, Teilo, and Oudoceus, Llandaff (1898)
• Annual report of the Friends of Llandaff Cathedral, 1937

Dolenni Ychwanegol

• Wikidata: Q6237949

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/