HOPKINS, WILLIAM (1706 - 1786), clerigwr ac awdur

Ganwyd yn Nhrefynwy. Fe'i haddysgwyd yn ysgol ramadeg Trefynwy a Choleg All Souls, Rhydychen, lle y graddiodd yn 1728. Wedi iddo fod yn gurad mewn amryw leoedd yn Sussex fe'i dewiswyd yn athro cynorthwyol ysgol ramadeg Cuckfield yn 1731, yn ficer Bolney, pentref cyfagos, yn fuan wedyn, yn athro ysgol Cuckfield yn 1756, ac, yn 1766, yn gurad Slaugham, y cyfan yn yr un sir. Cyhoeddodd nifer o weithiau dienw yn Saesneg yn beirniadu ffurfwasanaeth yr Eglwys ac yn gosod allan syniadau Ariaidd. Cefnogodd y ddeiseb i'r Senedd yn erbyn datganiad gorfodol o gydymffurfiad â'r Deugain Erthygl Namyn Un, ac yn 1772 cyhoeddodd ddau bamffled dienw ar y pwnc. Fel ficer Bolney a churad Slaugham gwnaeth y cyfnewidiadau a ddymunai yn y gwasanaeth heb wrthwynebiad gan y wardeiniaid. Bu farw yn 1786 yn 80 mlwydd oed.

Awdur

• Nansi Ceridwen Jones

Ffynonellau

• H. Blackwell, NLW MSS 9260A: A Dictionary of Welsh Biography
• Robert Williams, Enwogion Cymru. A Biographical Dictionary of Eminent Welshmen (1852), 220
• Oxford Dictionary of National Biography
• Foster, Alumni Oxonienses: the members of the University of Oxford, 1715-1886
• J. F. Waller, The Imperial Dictionary of Universal Biography a series of original Memoirs of distinguished Men of all ages and all nations (Caeredin 1857-63), ii, 939
• Allibone, A critical dictionary of English literature. and British and American authors, living and deceased. from the earliest accounts to the middle of the nineteenth century (Philadelphia 1859-71), i, 886
• E. G. Salisbury, Border Counties' Worthies (1878-80)
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)

Dolenni Ychwanegol

• VIAF: 75273543
• Wikidata: Q18672832

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/