HUGHES, HUGH JOHN (1828? - 1872), awdur a cherddor yn U.D.A.;

Ganwyd yn Brynmoel, gerllaw y Bala, Sir Feirionnydd, c. 1828. Ymfudodd i U.D.A. yn 1849 ac ymsefydlu yn Deerfield, talaith Efrog Newydd. Argraffydd ydoedd o ran galwedigaeth; yr oedd hefyd yn gerddor da. Yn 1859 enillodd wobr yn eisteddfod Utica am draethawd ar gerddoriaeth gysegredig; bu hefyd yn ysgrifennu erthyglau i'r Cyfaill (Utica). Cyhoeddodd (1) Y Delyn Aur: sef Casgliad o Hymnau, Tonau … (New York, 1868), (2) Y Drysorfa Gerddorol (Rome, N.Y., 1856-7), (3) Y Gronfa Gerddorol … (New York, 1868?), (4) Traethawd ar Gerddoriaeth Gyssegredig … (Rome, N.Y.), (5) Yr Awen Gymraeg: Pigion o Farddoniaeth Prif Feirdd Gwalia … (New York, 1871), (6) Llyfr Hymnau, Methodistiaid Calfinaidd … (New York, 1871). Bu farw 1 Ionawr 1872 yn Hyde Park, Pa.

Awdur

• Robert (Bob) Owen, (1885 - 1962)

Ffynonellau

• Y Drych, 26 Gorffennaf 1856
• Y Drysorfa gerddorol; sef casgliad o donau, anthemau, a darnau gosodedig; yn cynnwys tonau cynnulleidfaol, priodol i addoliad y gwir Dduw, yn nghydag amrywiaeth o donau ac anthemau cyfaddas at wahanol achosion crefyddol yn wreiddiol a detholedig o waith yr awduron goreu hen a diweddar (New York 1857), 1856-7
• Yr Awen Gymraeg (1869), 1869
• M. O. Jones, Bywgraffiaeth Cerddorion Cymreig (1890)
• Eos Llechid, Geiriadur … o Gerddorion Ymadawedig Cymru,' yn Yr Haul

Dolenni Ychwanegol

• VIAF: 107435107
• Wikidata: Q20733193

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/