HUGHES, JOHN (1850 - 1932), gweinidog gyda'r Methodistiaid Calfinaidd, awdur, a bardd

Ganwyd yn Abertawe ym Mai 1850, mab Dafydd ac Elizabeth Hughes. Symudodd ei rieni i Gwmafan, Morgannwg, ac yno y codwyd ef. Dechreuodd bregethu yn 1869, ac addysgwyd ef yn Nhrefeca a Phrifysgol Glasgow, lle y graddiodd yn M.A. Ordeiniwyd ef yn sasiwn Llangeitho, 1877, a bu'n weinidog yn Nowlais, Machynlleth, a Fitzclarence Road, Lerpwl. Bu'n llywydd cymanfa gyffredinol ei gyfundeb yn 1911. Ymneilltuodd i Forgannwg yn niwedd oes; bu farw ym Mhenybont-ar-Ogwr 24 Gorffennaf 1932, a'i gladdu ym Machynlleth. Yr oedd yn bregethwr grymus, yn ysgolhaig rhagorol, ac yn llenor medrus. Ei brif weithiau llenyddol, oedd Rhagtuniaeth Duw mewn Anian ac mewn Hanesyddiaeth, 1886; The Sabbatical Rest of God and Man, 1888; Gwanwyn Bywyd a'i Ddeffroad, 1899; Ysgol Jacob, 1899; a The Christian Consciousness ('Darlith Davies,' 1902). Cyhoeddodd rai cyfrolau o'i farddoniaeth, sef Songs in the Night, 1885; Tristiora, 1896; a Dan y Gwlith, 1911, a gynnwys ei emynau. Cyhoeddodd hefyd ambell gân goffa megis Fy Mam (d.d.), a chyfrol goffa Dr. Hugh Williams, Marwolaeth y Saint, 1905. Ychwaneger esboniad neu ddau ac ysgrifau yn Y Drysorfa a'r Traethodydd, a byddai hynny'n grynodeb llawn o'i gynnyrch llenyddol.

Awdur

• Y Parchedig Gomer Morgan Roberts, (1904 - 1993)

Ffynonellau

• D. C. Davies, Hanes Eglwys y Methodistiaid Calfinaidd yn Hermon, Dowlais ynghyd ag amlinelliad o hanes codiad anghydffurfiaeth yr ardal a chychwyniad Methodistiaeth yn y dosbarth (Bala 1905), 99-101
• T. Beynon, Gwrid ar Orwel ym Morgannwg (Caernarfon 1938), 64-77
• Y Goleuad, 3 Awst 1932
• Blwyddiadur y Methodistiaid Calfinaidd, 1934, 186

Dolenni Ychwanegol

• VIAF: 6888326
• Wikidata: Q20733457

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/