HUGHES, THOMAS JONES (1822 - 1891), clerigwr a gramadegydd

Ganwyd ym Mangor, 11 Mehefin 1822, a'i addysgu yn Ysgol Friars. Aeth oddi yno i Goleg y Drindod, Caergrawnt, gan ymaelodi yn 1840; daeth yn ysgolor o'i goleg a graddio â'r clod uchaf mewn mathemateg. Cymerodd ei B.A. yn 1844, M.A. yn 1847. Ordeiniwyd ef yn ddiacon gan yr esgob Bethell o Fangor, 1 Chwefror 1846, a chafodd urddau offeiriad 20 Rhagfyr yr un flwyddyn. Trwyddedwyd ef i guradiaeth Llanfaes ym Môn, ac yng Ngorffennaf 1850 aeth yn gurad i Laneurgain yn Sir y Fflint; oddi yno dyrchafwyd ef yn ficer Llanasa, Awst 1860, a bu yno hyd 1870, pryd y symudodd i Lanfair Dyffryn Clwyd. Bu yno'n ficer hyd ei farw, 5 Chwefror 1891, a chladdwyd ef yno. Priododd Eleanor, merch W. H. Brown o Gaer, 27 Mehefin 1865, a bu iddynt fab. Gwasanaethodd fel arolygydd ysgolion yn yr esgobaeth i'r esgob Short o Lanelwy, a chyfrannodd nifer o ysgrifau i'r Wasg Eglwysig Gymraeg, yn arbennig i'r Haul a'r ' Geiryddiaeth y Beibl Cymraeg,' 1885, 1886, a ' Cymraeg y Llyfr Gweddi,' 1887, 1888. Yn eisteddfod Aberffraw, 1849, enillasai wobr am draethawd ar 'Cystrawen a Theithi Cymraeg a Saesneg.'

Awdur

• Thomas Iorwerth Ellis, (1899 - 1970)

Ffynonellau

• Bye-Gones, relating to Wales and the Border Counties, 18 Chwefror 1891
• Yr Haul, 1891, 85
• A. Ivor Pryce, Diocese of Bangor During Three Centuries, seventeenth to nineteenth century inclusive being a digest of the registers of the bishops (1929)
• H. B. Thomas, A History of the Diocese of St. Asaph (1874)
• Venn, Alumni Cantabrigienses

Dolenni Ychwanegol

• Wikidata: Q20734491

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/