HUMPHREYS, JAMES (c. 1768 - 1830), ysgrifennwr ar faterion cyfreithiol

Ganwyd yn Nhrefaldwyn, chweched plentyn Charles Gardiner Humphreys, cyfreithiwr. Addysgwyd ef yn ysgol Amwythig ac yna aeth at William Pugh, Caerhywel, Trefaldwyn. Yn ddiweddarach aeth i swyddfa cyfreithiwr o'r enw Yeomans yng Nghaerwrangon. Ym mis Tachwedd 1887 aeth i Lundain. Aeth yn ddisgybl i Charles Butler, ac fe'i cofrestrwyd yn Lincoln's Inn. Derbyniwyd ef yn fargyfreithiwr ar 25 Mehefin 1800, a daeth yn llwyddiannus iawn fel ' conveyancer.' Yr oedd yn Rhyddfrydwr ac yn gyfeillgar â Fox, Syr James Mackintosh, Syr Francis Burdett, a Horne Tooke. Ei brif waith oedd Observations on the actual State of the English Laws of Real Property, with the outlines of a Code (Llundain 1826, ail arg. 1827). Daeth y gwaith hwn ag ef i fri fel diwygiwr ym myd y gyfraith, ac yn ddiweddarach mabwysiadwyd llawer o'r cyfnewidiadau a awgrymai. Bu farw 29 Tachwedd 1830 yn Upper Woburn Place, Llundain.

Awdur

• Elwyn Evans

Ffynonellau

• Cambrian Quarterly Magazine (1829–33), iii, 288
• Oxford Dictionary of National Biography
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)

Dolenni Ychwanegol

• VIAF: 60511970
• Wikidata: Q6136411

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/