JACOB, SARAH (1857 - 1869), yr ymprydferch

Ganwyd 12 Mai 1857, trydedd ferch Evan a Hannah Jacob, Llether-neuadd-uchaf, Llanfihangel Iorath, Sir Gaerfyrddin. Ym mis Chwefror 1867 bu mewn llewyg am fis cyfan, a phan ddadebrodd ni chymerodd ond ychydig o fwyd llaeth. Erbyn 10 Hydref 1867 dywedid iddi beidio â bwyta nac yfed dim, a honnid iddi fyw felly hyd ei marw, 17 Rhagfyr 1869 - 113 wythnos. Lledodd hanes ei hymprydio ar draws y wlad, a daeth yn bwnc trafodaeth ymysg meddygon blaenllaw. Deuai pobl o bell ac agos i weld yr eneth, gan roddi anrhegion iddi. Wedi llawer iawn o ddyfalu a dadlau gyrrwyd staff o nyrsus o ysbyty Guy, Llundain, i'w gwylio, ac ymhen ychydig dros wythnos bu'r ferch farw. Cyhuddwyd ei rhieni o ladd eu merch drwy beidio â rhoddi bwyd iddi, a dedfrydwyd hwynt i garchar.

Awdur

• Dr David Jenkins, (1912 - 2002)

Ffynonellau

• W. M. Wilkinson, The cases of the Welsh fasting girl and her father (London 1870)
• Robert Fowler, M.D., A Complete History of the Case of the Welsh Fasting-Girl (Sara Jacob) with Comments thereon and Observations on Death from Starvation (Llundain 1871)
• The Welsh Fasting Girl being a complete history of the remarkable case of Sarah Jacob, as revealed by authentic sources of information of absorbing general, medical and legal interest (Pencader 1904)

Darllen Pellach

• Archifau LlGC: NLW MS 23137E: Sarah Jacob, the 'Welsh fasting girl'
• D. G. Lloyd Hughes, Hanes hynod Sarah Jacob, y ferch a lwgwyd i farwolaeth, Y Casglwr pob peth printiedig, Rhif 51, Gaeaf 1993
• Richard W. Ireland, 'Sanctity, superstition and the death of Sarah Jacob', yn Making legal history (Cambridge 2012), tt. 284-302
• The Sarah Jacob Case, 1869, Cymdeithas Hanes Cyfraith Cymru
• John Cule, Wreath on the crown: the story of Sarah Jacob, the Welsh fasting girl (Llandysul 1967)
• Amgueddfa Arberth WOWW: 'Sarah Jacob'
• Erthygl Wicipedia: Sarah Jacob

Dolenni Ychwanegol

• NLW Archives: D. Roy Evans Collection A/10: A vol. of newspaper cuttings (12 Dec. 1869-18 Jan. 1870) relating to the death of, and the inquest upon, Sarah Jacobs
• VIAF: 38952351
• Wikidata: Q13131210

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/