JONES, DAVID (1708? - 1785), o Drefriw, bardd, casglwr llawysgrifau, cyhoeddwr, ac argraffydd

Ychydig a wyddys am ei eni a'i ieuenctid. Rhoddir enw ei dad fel Siôn ap Dafydd yn NLW MS 476E a NLW MS 3107B , ac enw ei fam fel Jane ferch Elizabeth Rowland yn B.M. Add. MS. 14888, a Jane ferch Dafydd ap Sion yn NLW MS 3107B . Enw ei wraig oedd Gwen ferch Richard ap Rhys (NLW MS 3107B ), ond ni wyddys dyddiad y briodas; ceir yng nghofrestri plwyf Trefriw gofnod am briodas rhwng rhyw David Jones a Gwenna Prichard ar 27 Ionawr 1734-5.

Fel bardd ysgrifennodd gryn dipyn, ond nid enillodd fri mawr. Ei brif bwysigrwydd yw fel golygydd y flodeugerdd o farddoniaeth a elwir Blodeu Gerdd Cymry, sef Casgliad o Caniadau Cymreig gan amryw Awdwyr o'r oes ddiwaethaf , 1759. Golygodd hefyd weithiau fel Histori Nicodemus , 1745, hen gyfieithiad Cymraeg o'r 'Gospel of Nicodemus,' Egluryn Rhyfedd , 1750, a Cydymaith Diddan , 1766, y ddau olaf yn gasgliadau o farddoniaeth a rhyddiaith. Yr oedd yn ddiwyd iawn hefyd fel casglwr hen lawysgrifau Cymraeg, a cheir ffrwyth ei lafur yng nghasgliadau'r Amgueddfa Brydeinig a Llyfrgell Genedlaethol Cymru. Yn ddiweddarach yn ei fywyd daeth gwasg argraffu i'w feddiant, ac ymsefydlodd fel argraffydd yn Nhrefriw. Dechreuodd argraffu yn 1776, a'r gwaith mawr cyntaf a ddaeth o'i wasg oedd Historia yr Iesu Sanctaidd yn 1776, cyfieithiad Cymraeg o'r 'History of the Holy Jesus' gan William Smith. Parhaodd i argraffu hyd ei farwolaeth, 20 Hydref 1785.

Awdur

• Griffith Milwyn Griffiths

Ffynonellau

• Ifano Jones, A history of printing and printers in Wales to 1810, and of successive and related printers to 1923 (Cardiff 1925)
• O. Gaianydd Williams, Dafydd Jones o Drefriw (1708-1785) (Caernarfon 1907)
• Morris Jones, Hanes Trefriw fel y bu ac fel y mae sef desgrifiad cryno o'r ardal a'r trigolion (Llanrwst 1879)
• A. O. Evans, 'Dafydd Jones, Trefriw, 1708-1785,' Journal of the Welsh Bibliographical Society, Awst 1937
• G. J. Williams (gol.), Llythyrau at Ddafydd Jones o Drefriw, cyfres iii, rhif 2, 1943
• Cofrestri Esgobaeth Bangor yn Llyfrgell Genedlaethol Cymru yn Ll.G.C.
• J. H. Davies, Catalogue of Additional Manuscripts in the National Library of Wales
• Archifau LlGC: NLW MS 476E: Llythyrau at David Jones ('Dewi Fardd')
• Archifau LlGC: NLW MS 783B: Barddoniaeth, &c.
• Archifau LlGC: NLW MS 841E: Barddoniaeth
• Archifau LlGC: NLW MS 843B: Barddoniaeth
• Archifau LlGC: NLW MS 2039D: Letters to Ieuan Fardd, &c.
• Archifau LlGC: NLW MS 3107B: Amseryddiaeth a Barddoniaeth
• Catalogue of Additions to the Manuscripts in the British Museum in the years 1841–1845 (London 1850), 1841-5

Gweithiau

• David Jones, History Nicodemus neu yn hytrach ysgrifen Nicodemus, oherwydd na ddetholodd yr Eglwys ond pedair Efengil (Dolgelley c.1800)

Dolenni Ychwanegol

• VIAF: 266441280
• Wikidata: Q18527386

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/