JONES, DAVID ('Welsh Freeholder '; 1765 - 1816), bargyfreithiwr ac awdur

Ganwyd ym Mwlch-y-gwynt, Llanymddyfri. Addysgwyd ef yng Ngholeg Homerton, Llundain, i fod yn weinidog gyda'r Methodistiaid Calfinaidd. Troes at yr Undodiaid, a symud i Goleg Hackney, lle y dewiswyd ef yn nes ymlaen yn athro mewn athroniaeth. Yn 1792 dilynodd y Dr. Priestley fel gweinidog y Tŷ Cwrdd Undodaidd yn Birmingham. Erbyn 1795 yr oedd yn astudio'r gyfraith yn Lincoln's Inn, ac yn 1800 dechreuodd ar ei waith fel bargyfreithiwr yn Llundain ac ar gylchdaith Rhydychen a De Cymru. Graddiodd yng Ngholeg Caius, Caergrawnt, yn 1800. Pleidiai ryddid crefyddol a gwleidyddol, ac o dan y ffugenw ' Welsh Freeholder ' ysgrifennodd gyfres o bamffledi i ateb ymosodiadau Samuel Horsley, esgob Tyddewi : (1) A Letter to the Right Rev. Samuel, Lord Bishop of S. David's, 1791; (2) Thoughts on the Riots at Birmingham, 1791; (3) The Welsh Freeholder's Vindication, etc., 1791; (4) Reasons for Unitarianism, 1792; (5) The Welsh Freeholder's Farewell Epistles, 1794. Bu farw yn 1816.

Diwygiwr yn hytrach na chwyldrowr oedd ef, Chwig a gredai mewn ufuddhau i'r llywodraeth wladol, ond yn bybyr dros ryddid.

Awdur

• John James Evans, (1894 - 1965)

Ffynonellau

• Rutt, The Theological and Miscellaneous Works, of Joseph Priestley. Vol 13. Containing Notes on the New Testament (1831), ii, 176, 177
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• Oxford Dictionary of National Biography

Dolenni Ychwanegol

• VIAF: 17095508
• Wikidata: Q5235729

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/