JONES, ERASMUS (1817 - 1909), nofelydd

Ganwyd 17 Rhagfyr 1817 ym mhlwyf Llanddeiniolen, Sir Gaernarfon. Bu yn ysgol Pentir, Sir Gaernarfon, eithr ymfudodd i Unol Daleithiau'r America yn 1833 gydag un o'i frodyr, ac ymsefydlu yn Efrog Newydd. Bu yn Trenton am gyfnod, yna yn Efrog Newydd, ac wedyn yn Remsen, Oneida County, talaith Efrog Newydd. Aeth i weinidogaeth y 'Methodist Episcopal Church' tua 1848. Yn 1852 dychwelodd i Gymru ac aros yma am gyfnod, yn pregethu, etc. Eithr aeth yn ôl i America a bu'n gaplan yn y fyddin yno. Bu hefyd yn gofalu am eglwysi yn Oneida County a mannau eraill, gan ymsefydlu yn nes ymlaen yn Utica. Cyhoeddodd The Higher Law Triumphant: The Captive Youths of Judah, 1886; The Adopted Son of the Princess (nofel a wobrwywyd yn eisteddfod Utica, 1870); The Welsh in America, 1876; Gold, Tinsel, and Trash, 1890; a Llangobaith: A Story of North Wales, 1886. Bu'n cystadlu hefyd mewn eisteddfodau, gan ennill gwobrwyon yn ' eisteddfod ffair y byd,' Chicago, 1893, eisteddfod Pittsburgh, etc. Bu farw 9 Ionawr 1909.

Awdur

• Robert (Bob) Owen, (1885 - 1962)

Ffynonellau

• Y Cenhadwr Americanaidd sef cylchgrawn gwybodaeth fuddiol a dyddorawl i Gymry America / The American messenger (Efrog Newydd 1840-1901), 1840-80
• Y Cyfaill cylchgrawn misol y Presbyteriaid Cymreig yn America (Utica), 1838-90
• Y Drych, 1855-1900
• The Cambrian (Utica), 1 Chwefror 1909

Darllen Pellach

• Erthygl Wicipedia: Erasmus Jones

Dolenni Ychwanegol

• VIAF: 107409958
• Wikidata: Q18535740

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/