JONES, EVAN (1790 - 1860), y diwethaf o siapanwyr Brynbuga

yr oedd yn disgyn o deulu Allgood. Prynodd y gwaith siapan gan John Pyrke yn 1826, eithr ar ôl marw John Hughes (1784 - 1851) - a marw Morgan Davies (1770 - 1837), ei arlunydd, cymharol ychydig o sylw a roes i'r busnes hwn gan ymddiddori fwy a mwy yn ei fferm, ei siop nwyddau haearn, ei waith priddfeini, a'i wai'th nwy - heb sôn am ei ran mewn bywyd cyhoeddus (bu'n aldramon Brynbuga a chwe gwaith yn borthfaer). Yr oedd yn gyfaill mynwesol i Edward John Trelawny (1792 - 1881) - gweler y D.N.B. - pan oedd hwnnw'n byw yn Twyn Bell, gerllaw Brynbuga ar stad Cefn Ila (1840-58). Yr oedd Evan Jones yn ymddiriedolwr eglwys Annibynnol Twyn. Bu farw 12 Mawrth 1860, ac fe'i claddwyd yn Twyn. Gadawsai ei waith siapanio i'w nith Elizabeth Jones. Priododd hi Philip John Pulling yn 1869, gwerthodd y stoc yn 1872, ac ymfudodd i U.D.A.

Awdur

• Robert Stephen, (1878 - 1966)

Ffynonellau

• Am y ffynonellau gweler yr erthygl ar Allgood

Dolenni Ychwanegol

• Wikidata: Q20733029

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/