JONES, GRIFFITH (1808 - 1886), Tregarth, Bangor, gweinidog gyda'r Methodistiaid Calfinaidd

Mab John Humphreys, Ty'n-y-clawdd, Tregarth. Cafodd gwrs byr o ysgol yn y Carneddi, ac wedyn yn Llanfairfechan. Gyda'i dad dysgodd grefft crydd. Dechreuodd bregethu yn 1832. Wedi iddo fod yn y Bala am oddeutu blwyddyn a chael ei dderbyn i'r gymdeithasfa yn 1834 ordeiniwyd ef yn 1845. Gwrthododd gymryd ei symud o'i fro gynefin ac yno y bu farw 18 Ebrill 1886.

Galwyd ef i fugeilio'r eglwys yn Nhregarth yn 1875. Er ei fod yn ŵr tal a chydnerth o ran ei gorff, un anhyderus a gwylaidd ei ffordd oedd Griffith Jones. Daeth craffter ac arabedd naturiol y gŵr diymhongar hwn yn hysbys i bawb o'i gyfoeswyr, ac nid rhyfedd bod cymaint galw amdano o Dde a Gogledd Cymru i bregethu a darlithio yn ei ddull digymar ei hun.

Awdur

• Y Parchedig Richard Thomas, (1872 - 1950)

Ffynonellau

• J. Mostyn Jones, Cofiant, pregethau, a ffraethebion, y Parch, Griffith Jones, Tregarth (Bala 1887), 1887
• Richard Owen, Adgofion am y diweddar Barch. Griffith Jones, Tre'rgarth yn cynwys hanes ei fywyd, casgliad cryno o'i ffraethebion, anerchiadau, ymddiddanion crefyddol, crynhodeb o'i ddarlith ar y "Ddau Frawd", ei lythyrau, ei angau, a'i gladdedigaeth, ynghyda lythyrau (Caernarfon 1886)
• W. Hobley, Hanes Methodistiaeth Arfon, v, 79-83
• Y Drysorfa, 1886, 193

Delweddau

• Hugh Humphreys, Rev. Griffith Jones Calvinistic Minister of Tregarth, Bangor
• LlGC: Griffith Jones, Tregarth, Llyfr Ffoto T Llechid Jones Album, 8v.

Dolenni Ychwanegol

• Wikidata: Q20733096

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/