JONES, ISAAC (1804 - 1850), clerigwr, cyfieithydd, a golygydd

Ganwyd 2 Mai 1804 yn Llanychaearn, ger Aberystwyth, yn fab i wehydd. Cafodd ei addysg gyntaf gan ei dad, a dywedir iddo fedru darllen Lladin yn 7 oed. Aeth i ysgol yn y plwyf, ac yna i ysgol ramadeg Aberystwyth. Bu'n athro yn yr ysgol honno wedyn, ac yn brifathro o 1828 hyd 1834. Ar ôl dwy flynedd yng Ngholeg Dewi Sant, Llanbedr-Pont-Steffan, lle yr enillodd ysgoloriaeth Eldon mewn Hebraeg, urddwyd ef yn ddiacon, Medi 1836, ac yn offeiriad, Medi 1837. Trwyddedwyd ef i guradiaeth Llanfihangel-genau'r-glyn yn 1836, ac ar ôl gwasnaethu yno ac yng Nghapel Bangor aeth, yn Chwefror 1840, yn gurad i Lanedwen a Llanddaniel-fab ym Môn. Bu yno hyd ei farw, 2 Rhagfyr 1850, a chladdwyd ef ym mynwent Llanidan. Cyfieithodd waith W. Gurney (dwy gyfrol) dan y teitl Geiriadur Ysgrythyrol, 1831, a chyhoeddodd Gramadeg Cymreig, sef Traethawd ar Egwyddorion yr Iaith, 1832.

Awdur

• Thomas Iorwerth Ellis, (1899 - 1970)

Ffynonellau

• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• Y Geninen, 1897, 37
• Geirlyfr Bywgraffiadol o Enwogion Cymru (1870)
• Benjamin Williams (Gwynionydd), Enwogion Sir Aberteifi (1868)
• Catalogue of Printed Literature in the Welsh Department, Cardiff Free Libraries (1898)

Dolenni Ychwanegol

• VIAF: 96850714
• Wikidata: Q18524054

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/