JONES, JOHN (1786?-1863), clerigwr a hynafiaethydd

Mab i John Jones, Lleddfa, Machynlleth. Addysgwyd ef yn Ysgol Friars, Bangor; aeth i Goleg Iesu yn Rhydychen yn Chwefror 1804 (ymaelododd yn yr un flwyddyn yn Lincoln's Inn), a graddiodd yn 1808. O 1809 hyd 1815 bu'n gurad Llanfihangel-ysgeifiog (Môn), o 1815 hyd 1819 yn gurad Llanfair-is-gaer, ac o 1819 hyd ei farwolaeth yn rheithor Llanllyfni. Cyhoeddodd saith o bregethau, ond mewn hynafiaethau yr oedd ei brif ddiddordeb; yr oedd yn un o aelodau cynnar Cymdeithas Hynafiaethau Cymru, a sgrifennodd lawer i'w chylchgrawn, Archæologia Cambrensis; sgrifennai hefyd i'r Brython, Golud yr Oes, a chyfnodolion eraill. Arddelai'r ffugenw 'Llef o'r Nant.' Cyhoeddwyd rhai o'i ysgrifau ar wahân, yng Nghaerfyrddin 1822 a Dinbych-y-pysgod 1822, a gadawodd doreth o lawysgrifau ar ei ôl. Bu farw 12 Chwefror 1863, a chladdwyd yn Llanllyfni.

Y mae'n anodd bod yn sicr pa bryd y ganwyd ef - yn ôl Foster, yn 1786 neu 1787, ond yn ôl ei faen coffa yn Llanllyfni, a ddywed ei fod yn 81 pan fu farw, 1782 fyddai'r flwyddyn.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Foster, Alumni Oxonienses: the members of the University of Oxford
• Llawysgrif Bangor yng Ngholeg y Gogledd, Bangor 6453 yng Ngholeg y Gogledd
• W. R. Ambrose, Hynafiaethau, cofiannau, a hanes presennol Nant Nantlle y traethawd buddugol yn Eisteddfod Gadeiriol Pen-y-groes, Llun y Pasg, 1871 (1872), 47

Dolenni Ychwanegol

• Wikidata: Q6661978

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/