JONES, JOHN (1807 - 1875), gweinidog gyda'r Methodistiaid Calfinaidd

Ganwyd 4 Hydref 1807, ym Melin Blaenpistyll, Llangoedmor, Sir Aberteifi, mab Samuel a Charlotte Jones. Symudodd yn ieuanc gyda'i rieni i'r Cytirbach, ger Blaenannerch. Cafodd ychydig addysg mewn ysgol ddyddiol, ac mewn ysgol yn Aberteifi yn ddiweddarach.

Ymddiddorai mewn pregethu er yn ieuanc iawn a dechreuodd bregethu ei hunan, yn 1833, ar ôl derbyn argraffiadau crefyddol dwys. Daeth yn enwog ar fyrder, a dechreuodd deithio'r wlad yn ôl arfer yr oes. Ordeinwyd ef yn sasiwn Llangeitho, 1841. Priododd, yn 1842, Mrs. James, Canllufaes, a bu'n byw yno ac yn y Cytir-bach nes iddo adeiladu ei dŷ ei hun - Brynhyfryd - ger Blaenannerch. Bu ar y maes am dros 40 mlynedd, ac ni bu mwy o fri ar neb yng Nghymru, mewn sasiwn a chymanfa, na'r 'hen Flaenannerch,' fel y gelwid ef. Yr oedd ei lais mawr, a'i ddoniau ysgubol, tanllyd, yn cario'r dydd ymhob man.

Bu farw 14 Ionawr 1875, a chladdwyd ef o flaen capel Blaenannerch.

Awdur

• Y Parchedig Gomer Morgan Roberts, (1904 - 1993)

Ffynonellau

• John Davies, Cofiant y Parchedig John Jones, Blaenanerch (Wrecsam 1880)
• John Evans, Byr-gofiant am naw a deugain o Weinidogion Ymadawedig sir Aberteifi (Dolgellau 1894), 83-6

Dolenni Ychwanegol

• Wikidata: Q20733508

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/