JONES, JOHN (1645 - 1709), canghellor eglwys gadeiriol Llandaf

mab (neu ŵyr) Matthew Jones, Pentyrch, Morgannwg. Bu'n ysgolor ac yn gymrawd o Goleg Iesu, Rhydychen, gan gymryd ei B.A. yn 1666, M.A. yn 1670, B.C.L. yn 1673, a D.C.L. yn 1677. Cafodd drwydded i wneuthur gwaith meddygol yn 1678 a bu wrth ei waith yn Windsor. Derbyniwyd ef i goleg y physygwyr yn 1677, a'i benodi'n ganghellor Llandaf yn 1691. Cyhoeddodd draethawd Lladin ar glefydau yn 1683, ac yn 1700 waith ar ddatguddiad dirgeledigaethau opiwm, a ddisgrifir fel ' peth rhyfedd ac ofnadwy na fedr neb mo'i ddeall.' Dyfeisiodd hefyd gloc 'a symudid gan awyr wedi ei gwasgu'n gyfartal allan o fegin ar ffurf silindr, a'i phlygion yn syrthio wrth ddisgyn yn ôl dull lanternau papur.' Cafodd drwydded 29 Awst 1678 i briodi Mary Starkey o Windsor; bu farw 22 Awst 1709 a'i gladdu ger porth gorllewinol eglwys gadeiriol Llandaf.

Awdur

• Thomas Iorwerth Ellis, (1899 - 1970)

Ffynonellau

• Hardy, Jesus College (1899)
• Foster, Alumni Oxonienses: the members of the University of Oxford
• Anthony Wood, Athenae Oxonienses (1813–20)
• Oxford Dictionary of National Biography

Dolenni Ychwanegol

• VIAF: 79093677
• Wikidata: Q6242030

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/