JONES, JOHN ('Eos Bradwen '; 1831 - 1899)

Ganwyd 16 Hydref 1831 mewn bwthyn ar lechwedd Talyllyn, Sir Feirionnydd, mab William ac Elizabeth Jones. Symudodd y teulu o'r bwthyn i bentref Tregorŵyr, ac oddi yno i Ddolgellau lle y dygwyd allan Y Seraph neu Gyfaill y Cerddor Ieuanc yn cynnwys tonau ac alawon. Yn 1858 aeth i fyw i Aberystwyth; yn 1863 penodwyd ef yn arweinydd corawl eglwys gadeiriol Llanelwy lle y llafuriodd am 15 mlynedd.

Enillodd lawer o wobrwyon a chadeiriau am bryddestau mewn eisteddfodau. Yn eisteddfod genedlaethol Llandudno 1864 enillodd am eiriau cantawd, ' Y Mab Afradlon '; yr un flwyddyn cyfansoddodd ei gantawd ' Owain Glyndwr,' a fu'n boblogaidd am gyfnod hir. Bu canu mawr ar ei gân, ' Bugeiles y Wyddfa,' hefyd. Enillodd wobr yn eisteddfod Llandudno, 1885, am opera, ' Dafydd ap Siencyn.' Yn 1878 aeth i fyw i Rhyl o Lanelwy, ac yn ddiweddarach i Gaernarfon.

Bu farw 29 Mai 1899 a chladdwyd ef ym mynwent Llanbeblig.

Awdur

• Robert David Griffith, (1877 - 1958)

Ffynonellau

• Mr John Jones (Eos Bradwen), Y Cerddor, Gorffennaf 1899
• Eos Bradwen: Y bardd a'r cerddor, Y Geninen (Gŵyl Dewi), 1901, tt.23-28

Darllen Pellach

• Lyn Davies, 'Jones, John (Eos Bradwen) (1831-99)', Cydymaith i Gerddoriaeth Cymru (Talybont 2018), tt.283-84

Dolenni Ychwanegol

• Wikidata: Q20733525

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/