JONES, JOHN MORGAN (1861 - 1935), gweinidog gyda'r Methodistiaid Calfinaidd ac awdur

Ganwyd 26 Mawrth 1861 ym Margam, Sir Forgannwg, ardal y bu'n gweithio ynddi am beth amser cyn myned i Goleg Arnold yn Abertawe ac oddi yno i Goleg Trefeca. Bu'n weinidog yn y Bwlch, sir Frycheiniog, ac yn Alexandra Road, Abertawe, cyn myned i Goleg S. Ioan, Caergrawnt, yn 1895; graddiodd yn B.A. yn 1898. Yn yr un flwyddyn penodwyd ef yn weinidog capel Methodistaidd Saesneg Hope, Merthyr Tydfil, a bu yno drwy ei oes ac eithrio un ysbaid byr ym Mangor yn 1902. Yr oedd yn ysgolhaig da, ac yn ŵr o argyhoeddiadau cryfion. Cymerai ddiddordeb ymarferol yng nghyflwr cymdeithasol ac economaidd pobl ei ardal. Gwasanaethodd fel ysgrifennydd a chadeirydd cynhadledd eglwysi Saesneg yr achos Presbyteraidd yng Nghymru. Cyhoeddodd lyfryn ar John Calvin dan y teitl, John Calvin: ei fywyd a'i waith, 1909, ac esboniad ar lyfr Esaiah, sef Llyfr y Proffwyd Esaiah, esboniad: pen. xl-lxvi, 1919. Traddododd gyfres o ddarlithiau ar grefydd Israel dan nawdd Coleg y Brifysgol, Caerdydd, a Chymdeithas Addysg y Gweithwyr (y ' W.E.A.') a chyhoeddwyd hwy yn 1936 dan y teitl, Y Datguddiad o Dduw yn yr Hen Destament; ymddangosodd cyfieithiad Saesneg yn 1942 - The Revelation of God in the Old Testament. Yr oedd yn bleidiwr digymrodedd i'r Mudiad Heddwch. Bu farw 22 Gorffennaf 1935.

Awdur

• Griffith Milwyn Griffiths

Ffynonellau

• Y Goleuad, 31 Gorffennaf a 14 Awst 1935
• The Merthyr Express, 27 Gorffennaf 1935
• Blwyddiadur y Methodistiaid Calfinaidd, 1936
• J. R. Tanner, The Historical Register of the University of Cambridge. Being a supplement to the Calendar, with a record of university offices, honours and distinctions to the year 1910 (Caergrawnt 1917)
• nodyn bywgraffyddol gan G. M. Ll. Davies yn The Revelation of God in the Old Testament (Llundain 1942)

Dolenni Ychwanegol

• VIAF: 98397655
• Wikidata: Q20733566

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/