JONES, THOMAS ('Canrhawdfardd '; 1823 - 1904), cerddor

Ganwyd 2 Gorffennaf 1823 yn Bwlch-y-creigiau ger Nannerch, Sir y Fflint, mab John a Mary Jones. Dysgodd ddarllen cerddoriaeth yn ieuanc, ac arweiniai y canu yng nghapel y Wesleaid yn 16 oed. Cynhaliai ddosbarthiadau cerddorol yn ardaloedd cylchynnol ei gartref. Yn 1849 dechreuodd bregethu gyda'r Wesleaid. Yn 1851 symudodd i fyw yn agos i Dreffynnon, ac oddi yno aeth i Lixwm. Yn 1864 symudodd i Goedpoeth i gadw siop lyfrau, ac argraffu. Enillodd lawer o wobrwyon am gyfansoddi, a bu amryw o'i anthemau yn boblogaidd. Cyhoeddodd y llyfrau canlynol (yn cynnwys tonau, anthemau, carolau, etc.): Y Symbal, Y Cerddor Gwreiddiol, Cerddor y Bobl, Moliant Israel, Organ y Plant, Y Cerbyd Cerddorol, Y Ddysglaid Gerddorol, Hymnau a Thonau, a'r gantawd Rhagluniaeth. Efe oedd golygydd cerddoriaeth y casgliad tonau, Cydymaith yr Addolydd, 1851. Bu farw 26 Hydref 1904, a chladdwyd ef yng nghladdfa gyhoeddus Coedpoeth.

Awdur

• Robert David Griffith, (1877 - 1958)

Ffynonellau

• M. O. Jones, Bywgraffiaeth Cerddorion Cymreig (1890)
• Edward Jones, Rhestr gyda nodiadau byrion, o Enwogion Cymreig o 1700 i 1900 (1908)
• Y Cerddor, Ionawr 1905

Darllen Pellach

• 'Y Diweddar Thomas Jones (Canrhawdfardd)', Y Gwyliedydd, 9 Tachwedd 1904, t.6

Dolenni Ychwanegol

• Wikidata: Q20734490

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/