JONES, WILLIAM (1762 - 1846), gweinidog Bedyddwyr Albanaidd, golygydd, ac awdur

Ganwyd 17 Mehefin 1762, yn Parkside, Gresford, yn fab i William a Mary Jones, eglwyswyr selog, ond yn Poulton y treuliodd ei fachgendod. Aeth i weithio i Gaer tua 1780, a bedyddiwyd ef yno gan Archibald McLean. Symudodd i Lerpwl i gadw siop lyfrau yn 1793, ac etholwyd ef yn henuriad yn yr eglwys newydd a gorfforwyd yno gan Archibald McLean a J. R. Jones, Ramoth, tua 1798-9. Aeth i Lundain yn 1812 yn weinidog eglwys Windmill Street, Finsbury, ac yno y bu hyd ei farwolaeth ar 21 Ionawr 1846, a'i gladdu ym mynwent Bunhill Fields. Priododd Elizabeth Crane, aelod o deulu Bedyddiedig yng Nghaer.

Pleidio'r Bedyddwyr Albanaidd oedd prif amcan ei waith llenyddol. Cychwynnodd The Theological Repository yn 1800, The Christian Advocate yn 1809, The Baptist Miscellany and Particular Baptist Magazine yn 1827, a The Millennial Harbinger (ffrwyth ei ohebiaeth ag Alexander Campbell) yn 1835. Bu'n olygydd The New Evangelical Magazine 1815-24, a The New Baptist Magazine, 1825, a chyhoeddodd amryw o lyfrau, yn cynnwys The History of the Waldenses, 1811; A Dictionary of Religious Opinions, 1815; The Biblical Cyclopaedia, 1816; Christian Biography, 1829; ac Autobiography (gol. gan ei fab), 1846.

Awdur

• John Idwal Jones

Ffynonellau

• Autobiography of the late William Jones, M.A. (Llundain 1846), 1846
• J. Idwal Jones, William Jones, A Memoir (1946), 1946
• Oxford Dictionary of National Biography
• British Museum. Catalogue of Printed Books (1882)
• David WilliamsCofiant J. R. Jones, Ramoth yn cynnwys casgliad helaeth o'i lythyrau (Caerfyrddin 1913)
• Trafodion Cymdeithas Hanes Bedyddwyr Cymru, 1940

Dolenni Ychwanegol

• VIAF: 102982907
• Wikidata: Q16851896

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/