KEMEYS a KEMEYS-TYNTE (TEULU), Cefn Mabli, sir Fynwy

Dywedir bod cangen Cefn Mabli o deulu Kemeys yn ddisgynyddion Stephen de Kemeys, perchen tir yn sir Fynwy c. 1234. Cysylltir hwy gyntaf â Chefn Mabli pan briododd DAVID KEMEYS, mab Ievan Kemeys o Began, â Cecil, merch Llewelyn ap Evan ap Llewelyn ap Cynfrig o Gefn Mabli, c. 1450. Dilynwyd hwy gan eu mab LEWIS. Yr etifeddion nesaf oedd JOHN KEMEYS a'i fab DAVID (bu farw 1564?). Bu mab hynaf David, sef EDWARD, yn siryf Morgannwg 1574-5, ond bu farw'n ddiblant. Daeth y stad i nai Edward, sef DAVID mab Rhys Kemeys o gastell Llanvair. Bu David yn siryf Morgannwg, 1616-7. Dilynwyd ef gan ei fab EDWARD, ond ni bu ŵyrion i Edward. Aeth y stad felly i Syr NICHOLAS KEMEYS o Lanvair, marchog, mab i'r Rhys o gastell Llanvair a nodwyd uchod. Bu ef yn siryf Mynwy, 1631-2, a Morgannwg, 1638-9. Bu hefyd yn aelod seneddol dros sir Fynwy, 1628-9. Yn 1642 gwnaed ef yn farwnig. Yr oedd yn Frenhinwr mawr, a chymerodd ran flaenllaw yn y Rhyfel Cartrefol. Bu farw tra'n amddiffyn castell Casgwent, 25 Mai 1648. Ei fab, CHARLES KEMEYS, oedd yr ail farwnig. Buasai ef yn efrydydd yng Ngholeg Iesu, Rhydychen, a gwnaed ef yn farchog yn 1643. Cymerodd yntau ran flaenllaw yn y rhyfel, ac ymladdodd dros y brenin yng nghastell Penfro. Ar gwymp y castell, gorfu iddo dalu dirwy o £3,500, ac alltudiwyd ef am ddwy flynedd. Bu farw 1658. Dilynwyd ef gan ei fab CHARLES KEMEYS, a fuasai'n efrydydd yng Ngholeg Wadham, Rhydychen. Bu ef yn aelod seneddol dros sir Fynwy, 1685-7, 1695-8, a thros fwrdeisdref Mynwy, 1690-5. Ymddengys ei enw fel siryf Morgannwg am y cyfnod 18-24 Mawrth 1689. Bu hefyd yn llywodraethwr castell Caerdydd, 1702. Bu farw Rhagfyr 1702. Dilynwyd ef fel 4ydd barwnig gan ei fab, CHARLES KEMEYS, a aned 23 Tachwedd 1688. Yr oedd ef yn siryf Morgannwg, 1712-3, yn aelod seneddol dros sir Fynwy, 1713-5, a thros sir Forgannwg, 1716-34. Bu farw 29 Ionawr 1735, yn ddiblant; ef oedd y barwnig olaf.

JANE KEMEYS (bu farw 1747)

Chwaer Charles Kemeys, y 4ydd barwnig. Yr oedd wedi priodi Syr John Tynte, barwnig (1683-1710), Halswell, Somerset. Bu iddynt dri mab, HALSWELL (1705-1730), JOHN (1707-1740), a CHARLES (1710-1785), ac un ferch, JANE (1708-1741). Bu farw eu ŵyrion yn ifanc, ac eithrio JANE (1738-1825), merch y Jane a nodwyd uchod a Ruishe Hassell, swyddog yn y fyddin. Daeth y stad iddi hi. Priododd hi, 19 Chwefror 1765, y cyrnol JOHN JOHNSON o Glaiston, sir Rutland, a chymerodd ef yr enw teuluol KEMEYS-TYNTE. Bu farw 1807.

Yn y 19eg. ganrif trosglwyddwyd y stad o dad i fab hynaf yn ddidor, a dyma'r etifeddion:

CHARLES KEMEYS KEMEYS-TYNTE (1778 - 1860), aelod seneddol

Ganwyd 29 Mai 1778; aelod seneddol dros Bridgwater, 1820-37, cyrnol yn y West Somerset Yeomanry. Priododd ef, 25 Ebrill 1798, Anne, merch y Parch. T. Leyson, ficer Bassaleg, sir Fynwy. Bu farw 22 Tachwedd 1860.

CHARLES JOHN KEMEYS-TYNTE (1800 - 1882), aelod seneddol

Ganwyd 1800; cyrnol yn y Royal Glamorgan Light Infantry; aelod seneddol dros orllewin Somerset, 1832-7, a Bridgwater, 1847-65. Priododd (1), 18 Gorffennaf 1820, Elizabeth, merch Thomas Swinnerton o Butterton Hall, sir Stafford; (2), Vincentia, merch W. Brabazon o Rath House, Louth, 15 Ebrill 1841. Bu farw 16 Medi 1882.

CHARLES KEMEYS KEMEYS-TYNTE (1822 - 1891), ustus heddwch a dirprwy-raglaw

Ganwyd 16 Mawrth 1822; ustus heddwch a dirprwy-raglaw dros sir Fynwy a Somerset; cyrnol yn y Somerset Militia. Priododd (1), 2 Tachwedd 1848, Mary, merch George Frome o Puncknoll, Dorset; (2) 1873, Hannah Lewis; a (3) 1879, Elizabeth, merch Richard Fothergill, aelod seneddol, Dinbych-y-Pysgod. Bu farw 10 Ionawr 1891.

HALSWELL MILBORNE KEMEYS-TYNTE (1852 - 1899), ustus heddwch a dirprwy-raglaw

Ganwyd 1852; ustus heddwch a dirprwy-raglaw dros sir Fynwy, ustus heddwch dros Sir Forgannwg a Somerset. Priododd, 25 Medi 1875, Rosabelle, merch Theobald Walsh o Kildare. Bu farw 18 Chwefror 1899.

CHARLES THEODORE HALSWELL KEMEYS-TYNTE (1876 - 1934), ustus heddwch

Ganwyd 18 Medi 1876. Bu'n ustus heddwch dros sir Fynwy a Somerset. Priododd, 10 Awst 1899, Dorothy, merch y cadfridog Syr Arthur E. A. Ellis. Buasai cysylltiad rhwng cangen o'r teulu a barwniaeth Wharton, ac yn Chwefror 1916 gwnaed Charles Kemeys-Tynte yn 8fed farwn Wharton. Bu farw 4 Mawrth 1934.

Awdur

• Griffith Milwyn Griffiths

Ffynonellau

• G. T. Clark, Limbus Patrum Morganiae et Glamorganiae (1886)
• Foster, Alumni Oxonienses: the members of the University of Oxford
• W. R. Williams, The parliamentary history of the principality of Wales, from the earliest times to the present day, 1541-1895 (Brecknock 1895)
• Thomas Nicholas, Annals and Antiquities of the Counties and County Families of Wales (London 1872), cyf.I
• Thomas Nicholas, Annals and Antiquities of the Counties and County Families of Wales (London 1872), cyf.II
• Public Record Office, List of Sheriffs for England and Wales … to A.D. 1831 (1898) (P.R.O.)
• Archaeologia Cambrensis, 1883, 114; 1887, 127
• John Roland Phillips, Memoirs of the Civil War in Wales and the Marches, 1642–1649 (London 1874)
• Catalogue of tracts of the Civil War and Commonwealth period relating to Wales and the Borders, National Library of Wales (Aberystwyth 1911)
• Burke's Landed Gentry
• Burke's … Peerage, Baronetage, and Knightage
• Return of Members of Parliament Pt. 1. Parliaments of England, 1213-1702. Pt. 2. Parliaments of Great Britain, 1705-1796. Parliaments of the United Kingdom, 1801-1874. Parliaments and Conventions of the Estates of Scotland, 1357-1707. Parliaments of Ireland, 1559-1800 (Llundain 1878), 1213-1702
• Archifau LlGC: NLW MS 5172F, NLW MS 5178E, NLW MS 5181E, NLW MS 6535A, NLW MS 6546E, NLW MS 6548B, NLW MSS 6587E, 6588C, NLW MS 6594B, NLW MS 6610E, NLW MS 6611E
• H. Blackwell, NLW MS 9263A: A Dictionary of Welsh Biography

Darllen Pellach

• John Rowland, Sir Nicholas Kemeys, Bart., Cefn Mably, the captor and defender of Chepstow Castle, with the family history and pedigree, deduced from pedigrees and MSS. (Cardiff 1881)

Dolenni Ychwanegol

• Wikidata: Q20738124

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/