LEWIS, WILLIAM JAMES (1847 - 1926), awdurdod ar risialau

Ganwyd 16 Ionawr 1847, yn ail fab i John Lewis, clerigwr, yn Llanwyddelan. O ysgol Llanrwst, aeth yn 1865 i Goleg Iesu, Rhydychen. Rhoddwyd ef yn y dosbarth blaenaf yn ' Mathematical Moderations ' (1867), yn y ' Mathematical Schools ' (1868), ac mewn gwyddoniaeth (1869). Etholwyd ef yn 1872 yn gymrawd o Goleg Oriel - gan na phriododd, parhaodd (yn ôl yr hen drefn) i ddal ei gymrodoriaeth hyd ei farw, h.y. am 54 mlynedd. Wedi bod am ychydig yn athro ysgol, a bwrw ysbaid yng Nghaergrawnt yn astudio meini grisial, cafodd swydd (1875) yn yr Amgueddfa Brydeinig, ond rhoes hi i fyny yn 1877 yn herwydd afiechyd. Yn 1879, dychwelodd i Gaergrawnt i ddarlithio ar fwnofyddiaeth; yn 1880 ymaelododd yng Ngholeg y Drindod yno; ac yn 1881 etholwyd ef yn athro 'r pwnc hwnnw yn y brifysgol. Ni sgrifennodd lawer, ar wahân i'w werslyfr safonol A Treatise on Crystallography, 1899. Etholwyd ef yn F.R.S. yn 1909. Bu farw 16 Ebrill 1926.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• T. Iorwerth Jones, 'The Contributions of Welshmen to Science', Trafodion Anrhydeddus Gymdeithas y Cymmrodorion, 1932-3 (gyda rhestr o'i bapurau)

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/